राजविराज । संघीय समाजवादी फोरम नेपालका अध्यक्ष उपेन्द्र यादवले मधेस र मधेसी जनताको हक र अधिकार स्थापित नभएसम्म संघर्ष जारी रहने बताएका छन् ।
सप्तरी क्षेत्र नं. २ बाट प्रतिनिधिसभा सदस्यमा निर्वाचित भएपछि सप्तरी सदरमुकाम राजविराजमा आयोजित विजयी ¥यालीलाई सम्बोधन गर्दै उनले मधेशका जिल्लामा आएको जनमतले मुलुकमा संविधान संशोधन गर्नुपर्ने दिशा निर्देश गरेको बताए ।
अध्यक्ष यादबले मधेशको समस्या समाधान नभएसम्म कुनै पनि हालतमा राष्ट्रिय समस्याको समाधान नहुने बताउँदै मधेशको सवाल कुनै जातीय र क्षेत्रको नभई राष्ट्रिय सवाल भएको पुष्टि भइसकेको धारणा व्यक्त गने ।
संघीयता, समावेशिता, प्रादेशिक स्वायत्तता र स्वशासनको सवालमा मधेश एकमत रहेको उल्लेख गर्दै उनले गरिवी, बेरोजगारी र अभावग्रस्तजस्ता समस्याबाट मधेशका जनता बढी पीडित रहेको बताए ।
अध्यक्ष यादबले भने, “वर्षौदेखि सिंहदरबारमा बस्नेहरू यसका दोषी हुन्, उनीहरू मधेशप्रति पूर्वाग्राही भएर नश्लवादी चिन्तन देखाएको छ ।”
