काठमाडौं । गृहमन्त्री रामबहादुर थापा विमानस्थलको अनुगमनका लागि त्रिभुवन अन्तर्राष्ट्रिय विमानस्थल पुगेका छन् । उनले आज(बुधबार) विमानस्थल र विमानस्थलको अध्यागमन कार्यालयको अनुगमन गरेका छन् ।
नेपाल भ्रमण वर्ष २०२० नजिकिएसँगै अध्यागमन गरि कार्यालय सुधारको अवस्था बुझ्न गृहमन्त्री थापा विमानस्थल पुगेका हुन् । उनले यात्रुहरूको प्रस्थान कक्ष, आवागमन कक्ष, प्रहरीको सीसीटीभी मोनिटरिङ कक्षलगायतको निरीक्षण गरे ।
अनुगमनपश्चात उनले विमानस्थल तथा अध्यागमन कार्यालय पहिलेभन्दा निकै सुधार भए पनि अहिलेको अवस्था अपर्याप्त रहेको भन्दै थप गुणात्मक सुधार गर्न निर्देशन दिएको स्रोतले बतायो ।
गृहमन्त्री थापासँगै गृहसचिव प्रेमकुमार राई, प्रधानमन्त्रीका प्रमुख सल्लाहकार विष्णु रिमाल, सुरक्षा निकायका उच्च अधिकारीहरूसमेत विमानस्थल पुगेका थिए ।
अध्यागमन विभागका महानिर्देशक ईश्वरराज पौडेलले अध्यामन सुधारको कार्ययोजनाअनुसार अहिले अध्यागमनमा नेपालले आफ्नो सफ्टवेयर ‘नेपाली पोर्ट’ निर्माणको कार्य तथा नयाँ भौतिक संचरना निर्माणको कार्य अन्तिम चरणमा पुगेको जानकारी दिए ।
