समाचार

निजी गाडी आफै कुदाएर छड्के अनुगमन गर्दै मन्त्री नेम्बाङ

काठमाडौं । भौतिक पूर्वाधार तथा यातायात मन्त्री बसन्तकुमार नेम्बाङले सडक मर्मत कार्यको छड्के अनुगमन गरेका छन् । माइतीघरदेखि तीनकुनेसम्म मर्मत भईरहेका सडकको शनिबार अनुगमन गरेका हुन् ।

मन्त्री नेम्बाङ आफ्नो नीजि नम्बर प्लेटको गाडी आफै ड्राइभ गरेर अनुगमनमा सुटुक्क निस्किएका हुन् । अपरान्ह ४ः १५ बजे नयाँ बानेश्वर, मीनभवन अगाडी सडक मर्मत भइरहेको स्थानमा उनको सेतो गाडी रोकियो । जहाँ ट्राफिक डाइभर्सनका लागि डोरी टाँगिएका थिए ।

डोरी टाँगिएकै अगाडी प्राइभेट नम्बरको गाडी रोकिएपछि एकछिन त सडक निर्माणमा खटिएका कर्मचारीहरु अलमलमा परे । जब ती कर्मचरीहरुले विभागीय मन्त्री नै अनुगमन आएको थाहा पाए हत्तपत्त डोरि खोलियो ।

उनले गाडीबाट ओर्लिएर मर्मत भइरहेको स्थानमा सुक्ष्म अवलोकन गर्नुका साथै निर्माणमा खटिएका कर्मचारीबाट जानकारी समेत लिएका छन् । जहाँ विछ्याइएको अस्फाल्टको परिक्षण समेत गरिए । अस्फाल्टको तह ६ सेन्टिमिटर रहेका थिए ।

निर्माणमा खटिएकी इन्जिनियर सजना अधिकारीले अस्फाल्टको तह चार सेन्टिमिटर हुने तर अहिले रोलरले नथिचिएकाले छ सेन्टिमिटर रहेको जानकारी गराएका थिए  ।  अघिलो शनिबारदेखि यो सडक खण्डको आवधिक मर्मत कार्य भइरहेको छ ।

ट्राफिक चापका कारण शनिबार–शनिबार मात्र काम भइरहेको र आउँदो शनिबार निर्माण कार्य सक्ने लक्ष्य राखिएको इन्जिनियर अधिकारीले जानकारी दिएका छन् ।  त्यस्तै मन्त्री नेम्बाङले लाखौ सेवाग्राहीले समस्या झेलिरहनु परेको स्मार्ट लाइसेन्स छपाईको समेत छड्के अनुगमन गरेका छन् ।

यातायात व्यवस्था विभाग पुगेर स्मार्ट लाइसेन्स छाप्नका निम्ति सञ्चालनमा लिइएको मास प्रिन्टको वस्तुस्थिति बारे उनले जानकारी लिएका हुन् । ट्रायल पास गरेर एक बर्षसम्म लाइसेन्स नपाउने अवस्थाको अन्त्य गरि सहज रुपमा लाइसेन्स वितरण गर्न उनले पहल थालेका हुन् ।

अहिले सञ्चालनमा आएको उक्त मास प्रिन्टले दैनिक दश हजार प्रिन्ट गर्छ । यस मेसिनले प्रभावकारी रुपमा काम गरे लाइसेन्सको समस्या चार महिनामा समाधान हुनेछ । ट्रायल पास गरेका करिव ८ लाखले लाइसेन्स पाएका छैनन् ।