टोखा मिलनटोलको सडक कालोपत्रे

२६ मङ्सिर, काठमाडौँ । टोखा नगरपालिकाले मिलनटोलको सडक कालोपत्रे शुरु गरेको छ । ऐतिहासिक, सांस्कृतिक पर्यटकीय समृद्ध नगर निर्माणको अभियानमा जुटेको सो नगरपालिकाले एक करोड सात लाख लागतमा आज टोखा–८ स्थित मिलनटोलको सडक कालोपत्रे शुरु गरेको हो ।

टोखा नगरप्रमुख प्रमुख प्रकाश अधिकारीले नगरपालिकाले भौतिक संरचना निर्माण र सडक पूर्वाधारलाई विशेष प्राथमिकतामा राखेर काम गरिरहेको बताए । “संविधानले दिएको अधिकार पूर्णरुपमा कार्यान्वयन गर्नका लागि नगरपालिकाको संस्थागत क्षमता वृद्धि, पूर्वाधार विकास, प्रशासनिक भवन निर्माण, वडा कार्यालयका भवन निर्माणलाई प्राथमिकमा राखेका छौँ,” उनले भने । नयाँ कालोपत्रे हुन लागेको सडकको लम्बाइ एक हजार १०० मिटर र चौडाइ चार मिटर रहेको छ ।

यस्तै नगरपालिकाले १२ करोड लागतमा टोखा–७ मैजुहिटीमा नगरपालिकाको भवन निर्माण गरिरहेको छ भने टोखा–९ को गोँगबु र वडा नं ११ को महादेवटार हाइटमा वडा प्रशासनिक भवन निर्माण भइरहेको नगरपालिकाका प्रवक्ता बच्चुराज बस्यालले जानकारी दिए ।