५ साउन, काठमाडौँ । पूर्वप्रधानमन्त्री कीर्तिनिधि विष्टको योगदानप्रति आदर, श्रद्धा र सम्मान प्रकट गर्न ‘देशभक्त राजनेता कीर्तिनिधि विष्ट’ नामक ग्रन्थ प्रकाशन गरिएको छ ।
नई प्रकाशनले आज यहाँ आयोजना गरेको कार्यक्रममा पूर्वप्रधानन्यायधीश अनुपराज शर्मा, शिक्षाविद् प्रा डा सुरेशराज शर्मा र वरिष्ठ समालोचक प्रा डा वासुदेव त्रिपाठीले सामूहिक रूपमा सो ग्रन्थ लोकार्पण गरे । कृतिमाथि समीक्षा गर्दै प्रा केशव सुवेदीले पूर्वप्रधानमन्त्री विष्ट राजनीति र नैतिकतालाई जोडेर हिँड्न सक्ने नेताका रूपमा स्थापित भएको बताए ।
कृतिमा लेखकहरूले उनी आर्थिक विवादमा नमुछिएको विषयसमेत उल्लेख गरेको जानकारी समीक्षक सुवेदीले दिए । विसं २०४७ पछि अरु पञ्चहरू बसाइँ सरे पनि विष्ट भने आदर्शमा अविचलित रहेको र पूर्वप्रधानमन्त्रीका रूपमा राज्यबाट कुनै पनि सुविधा नलिएको विषयलाई पनि कृतिमा स्थान दिइएको छ । कुनै प्रचारप्रसार नखोजी बस्ने नेताका रूपमा पनि विष्टलाई चिनिन्छ ।
नरेन्द्रराज प्रसाई तथा इन्दिरा प्रसाईबाट सम्पादित कृतिमा पूर्वप्रधानमन्त्री विष्टको योगदानको विवरण उल्लेख गरिएको छ । नई प्रकाशनको एक सय ८३औँ कृतिका रूपमा ‘देशभक्त राजनेता कीर्तिनिधि विष्ट’ ग्रन्थ प्रकाशित भएको हो । पाँच सय ८८ पृष्ठको ग्रन्थमा प्रधानमन्त्री केपी शर्मा ओली, पूर्वप्रधानमन्त्रीद्वय लोकेन्द्रबहादुर चन्द र माधवकुमार नेपाल, राष्ट्रकवि माधव घिमिरे, वाङ्मय शताब्दी पुरुष सत्यमोहन जोशी, नेताहरू सिपी मैनाली, पशुपतिशमशेर राणा, नवराज सुवेदी, अर्जुननरसिंह केसी, कमल थापा, डा भेषबहादुर थापा, समाजसेवी भद्रकुमारी घले, वरिष्ठ अधिवक्ता कृष्णप्रसाद भण्डारी, पूर्वमुख्यसचिव लोकमानसिंह कार्कीसमेत ६९ जना व्यक्तित्वका लेख समेटिएको छ ।
