२५ भदौ, वार्सा । पोल्यान्डका प्रधानमन्त्री डोनाल्ड टस्कले मङ्गलबार अनियमित आप्रवासनलाई रोक्न सीमा नियन्त्रणलाई कडा बनाउने छिमेकी मुलुक जर्मनीको निर्णयलाई ‘अस्वीकार्य’ भनेका छन् ।
जर्मनीले सोमबार धेरै संदिग्ध इस्लामी आक्रमणले सार्वजनिक आक्रोश र सरकारमाथि दबाब बढाएपछि युरोपेली सङ्घ (इयु) का सबै छिमेकीसँग आफ्नो भूमि सीमाहरूमा अस्थायी नियन्त्रण विस्तार गर्ने बताएको थियो । विस्तारित सीमा नियन्त्रण सुरुआती छ महिनाका लागि सेप्टेम्बर १६ देखि लागु हुनेछ ।
“पोल्यान्डको दृष्टिकोणबाट यस प्रकारको कारवाही अस्वीकार्य छ”, वार्सामा एक टेलिभिजन कार्यक्रममा टस्कले भने, “हाम्रो सीमामा ठूलो नियन्त्रणको सट्टा पोल्यान्डलाई इयुको बाहिरी सीमाहरूको रक्षा र सुरक्षामा जर्मनीसहित मुलुकहरूको धेरै सहभागिता आवश्यक छ, आगामी घन्टाहरूमा हामी तत्काल परामर्शका लागि बर्लिनको निर्णयबाट प्रभावित अन्य मुलुकमा पुग्नेछौँ ।”
पोल्यान्ड इयुको पूर्वी क्षेत्रमा आप्रवासी आगमनको सामना गरिरहेका मुलुकहरूमध्ये एक हो । यस क्षेत्रलाई बेलारुस र उसको सहयोगी रुसद्वारा ‘हाइब्रिड’ आक्रमणका रूपमा वर्णन गरिन्छ ।
सन् २०२१ को गृष्मपछि हजारौँ आप्रवासी र शरणार्थीहरूले मुख्यतया मध्यपूर्वबाट बेलारुस र पोल्यान्डको बीचको सीमा पार गर्ने वा पार गर्ने प्रयास गरेका छन् ।
वार्साले मस्कोमाथि अफ्रिकाबाट युरोपमा मानिसहरूको तस्करी गरेर उनीहरूलाई बेलारुसको बाटो हुँदै पोलिश सीमामा पठाएको आरोप लगाएको छ ।
मे महिनामा वार्साले सीमा बलियो बनाउन दुई अर्ब ३० करोड युरोभन्दा धेरै खर्च गर्ने घोषणा गरेको थियो । अर्को महिना सीमामा गस्तीमा रहेका एक पोलिश सैनिकलाई सन् २०२२ मा पोल्यान्डले बनाएको पाँच मिटर अग्लो धातुको बारमा छुरा प्रहार गरी हत्या गरिएको थियो ।
पोलिश सेनाले सीमामा सैनिकहरूमाथि अन्य आक्रमणको पनि सूचना दिएको छ । जुलाईमा पोलिश सांसदहरूले बेलारुससँगको तनावपूर्ण सीमासहित सक्रिय खतराको जवाफमा सुरक्षा बलहरूलाई घातक हतियार प्रयोग गर्न अनुमति दिनका लागि मतदान गरेका थिए । 
