स्टारलिङ्क विस्तारका लागि मस्कसँग वार्ता भइरहेको बङ्गलादेशको भनाइ

२ फागुन, ढाका । आफ्नो नाजुक अन्तरिम सरकारले अमेरिकी कूटनीतिक समर्थन खोजिरहेको बेला बङ्गलादेशले शुक्रबार टेक अर्बपति एलन मस्कलाई स्याटेलाइट इन्टरनेट सेवा स्टारलिङ्क दक्षिण एशियाली देशमा ल्याउन अनुरोध गरेको बताएको छ ।

राष्ट्रपति डोनाल्ड ट्रम्पको दाहिने हातका रूपमा मस्कको ह्वाइट हाउसमा उच्च भूमिका छ । जहाँ विदेशी नेताहरूसँगको उनको बैठकले उनको आधिकारिक भूमिका र व्यावसायिक हितका बीचको सीमा अस्पष्ट भएको बारे प्रश्नहरू खडा गरेको छ ।

विश्वको सबैभन्दा धनी व्यक्ति मस्कले बिहीबार गत वर्ष विद्यार्थी नेतृत्वको क्रान्तिपछि बङ्गलादेशमा कार्यवाहक प्रशासनको नेतृत्व गरिरहेका नोबेल शान्ति पुरस्कार विजेता मुहम्मद युनुससँग कुराकानी गरेका छन् ।

उनीहरूले लामो भिडियो कलमा पृथ्वीको तल्लो कक्षीय स्याटेलाइटहरू मार्फत दूर दराजका स्थानहरूमा इन्टरनेट पहुँच प्रदान गर्ने स्टारलिङ्क बङ्गलादेशमा ल्याउने बारे छलफल गरे ।

दुवैले यो सेवाले ‘बङ्गलादेशका उद्यमी युवा, ग्रामीण र कमजोर महिला र दूर दराजका समुदायहरू’ का लागि नयाँ अवसरहरू सिर्जना गर्ने कुरामा जोड दिनुभएको युनुसको मिडिया कार्यालयको विज्ञप्तिमा उल्लेख छ ।

विज्ञप्तिमा युनुसले निमन्त्रणा दिएपछि मस्कले बङ्गलादेश भ्रमण गर्न ‘उत्सुक’ रहेको बताएको उल्लेख छ ।

मस्कले अहिलेसम्म यो बैठकबारे– एक्स सामाजिक मिडिया प्लेटफर्ममा पनि जसको उनी मालिक हुनुहुन्छ र जहाँ उनी आफ्ना दैनिक विचारहरू राख्छन्– सार्वजनिक रूपमा छलफल गरेका छैनन् ।

ट्रम्पको निमन्त्रणामा वासिङ्टनमा रहेका भारतीय प्रधानमन्त्री नरेन्द्र मोदीसँग मस्कको भेट भएको दिन नै यो कुराकानी भएको थियो ।

गत वर्षको विद्रोहले स्वेच्छाचारी पूर्व प्रधानमन्त्री शेख हसिनालाई हटाएपछि युनुस पदमा आएदेखि मोदीको सरकारको बंगलादेशसँगको सम्बन्ध बिग्रिँदै गएको छ।

भारत हसिनाको सबैभन्दा महत्त्वपूर्ण हितैषी थियो र उनी नयाँ दिल्लीमा निर्वासनमा छिन्, बंगलादेशले विद्रोहमा सयौं प्रदर्शनकारीहरूको हत्याको मुद्दामा सामना गर्न उनलाई प्रत्यर्पण गर्न माग गरे पनि।