२३ फागुन, विराटनगर । कोशी प्रदेशका मुख्यमन्त्री हिक्मतकुमार कार्कीले कोशी प्रदेश सरकार निजी क्षेत्रसँग सहकार्य गर्न तयार रहेको बताएका छन्।
विराटनगर ट्रक व्यवसायी सङ्घको ३३औँ वार्षिक साधारणसभा एवं १७औँ अधिवेशनको आज यहाँ उद्घाटन गर्दै उनले सरकारले चाहेर पनि सबै काम गर्न नसक्ने भएकाले निजी क्षेत्रको साथ र सहयोग आवश्यक छ भने ।
उनले भने, “उत्पादन बढाउने, राष्ट्रिय आय अभिवृद्धि गर्ने र रोजगार सिर्जना गर्नसक्ने निजी क्षेत्रसँग सहकार्य गर्न तत्पर छु ।” उनले विगतमा सिमसार क्षेत्र, वनभोज स्थल, मठमन्दिरमा गरेका लगानीबाट सोचेजति प्रतिफल प्राप्त हुन सकेकाले सरकार यसबाट पाठ सिकेर उत्पादन र सेवाका क्षेत्रमा लगानी गर्ने योजनामा रहेको जानकारी दिए ।
ट्रक व्यवसायी सङ्घको आग्रहमा ट्रक पार्किङस्थल निर्माणका गर्न प्रदेश सरकारले रु दुई करोड लगानी गरेको जानकारी दिँदै मुख्यमन्त्री कार्कीले भने, “पार्किङस्थल निर्माणबाट सडकमा थुप्रिएर रहेका ट्रकको पनि व्यवस्थापन हुने र यसबाट प्रदेश सरकारलाई आम्दानी पनि हुनेछ ।”
उनले असारे विकासलाई हतोत्साहित गर्न जेठ १५ गतेदेखि निर्माणका काम रोकी अनुगमनलाई प्रभावकारी ढङ्गले परिचालन गर्ने बताए । साथै सरकार अब कृषि र पर्यटनका क्षेत्रमा योगदान दिन चाहेको धारणा राखे ।
मुख्यमन्त्री कार्कीले राष्ट्रिय पुँजी निर्माण गर्न सरकारले लगानी सम्मेलन गर्न लागेको र यसबाट प्रदेशमा लगानीका सम्भावनाहरु बढ्ने, रोजगार सिर्जना हुने, उत्पादन एवं उत्पादकत्व पनि बढ्ने विश्वास व्यक्त गरे ।
