२० चैत, धरान । कोशी प्रदेशकै पर्यटकीय क्षेत्र सागुरीगढी गाउँपालिकामा प्राकृतिक जडीबुटीबाट साबुन बनाउने तालिमको समापन गरिएको छ । चैत्र १५ देखि १९ गतेसम्म पाँच दिनसम्म चलेको तालिमको आयोजना साँगुरीगढी गाउँपालिकाले गरेको हो । गाउँपालिकाको वडा नं. ७ स्थित गोलखाँडी स्रोत भवनमा आयोजना गरिएको सो तालिमको सहजीरण सम्बृद्धि प्राकृतिक सावुन उद्योग धरान १५ की सञ्चालिका तथा महिला उद्यमी मनिता घिमिरेले गरेका थिइन्।
सो तालिमको प्राविधिक सहयोग मनभरा रिसर्ज प्रा.लि.ताप्लेजुङले गरेको थियो । महिलाहरुलाई तालिम दिएर स्वरोजगार बनाउने उदेश्यका साथ आयोजना गरिएको हो । तालिममा नेपालमै जताततै पाइने जडिबुटी गाँजा र तीतेपातीबाट साबुन बनाउन सिकाइएको सहजीकरणको भूमिकामा रहेकी उद्यमी महिला घिमिरेले जानकारी दिइन् ।
साँगुरीगढी गाउँपालिकाका अध्यक्ष जितेन्द्र रुम्दालीको प्रमुख आतिथ्य तथा तालिममा साँगुरीगढी गाउँपालिकाकी सदस्य कुमारी विकको अध्यक्षतामा सम्पन्न सो तालिममा महिलालाई लक्षित गरेर आयोजना गरिएको भउपनि महिला र पुरुष गरी २५ जनाले सहभागिता जनाएका थिए । सो अवसरमा बोल्दै अध्यक्ष रुम्दालीले गाँजालाई राज्यले अवैधानिक रुपमा लिए पनि गाँजालाई सही सदुपयोग गरेको खण्डमा राम्रो हुने बताए । उनले राज्यबाट वैधानिकता पाउने नपाउने कुराभन्दा पनि गाँजाबाट बनाइएका प्राकृतिक सावुन अत्यन्ते गुणस्तरीय हुने बताए। गाउँपालिकाले स्वरोजगार बनाउने तालिमबाट छुट्याएको बजेटबाट तालिमको आयोजना गरिएको बताउदै तालिमबाट सिकेका कुरालाई व्यवहारमा उतार्दै आत्मनिर्भर बन्न तालिममा सहभागीहरुलाई सुझाव दिए। यस्तै कार्यक्रमको अध्यक्षता गरेकी वडा सदस्य विकले पछिल्लौ समय राज्यबाट महिला लक्षित कार्यक्रमहरुलाई प्राथमिकतामा राखेर महिला वृत्ति विकासमा जोड दिएको भन्दै तालिममा सिकेका कुरालाई व्यवहारमा उतार्न सहभागीहरुलाई अनुरोध गरिन् । सहजीकरणको भूमिकामा रहनु भएकी घमिरेले आफूले साँगुरीगढी गाउँपालकाजस्तै अन्य पालिकामा समेत सहजीकरणको भूमिका निर्वाह गर्दै आएको बताउदै धैरै पालिकाहरुले आफूले सिकाएको कुरालाई व्यवहारमा उतारेको पाइएकोले यहाँ पनि सहभागीहरुले तालिमबाट सिकेका कुरालाई सही सदुपयोग गरेर जानुहुनेछ भन्ने अपेक्षा लिएको बताइन् ।
