२१ चैत, काठमाडौँ । काठमाडौँ महानगरपालिकाको प्रमुख प्रशासकीय अधिकृत विवाद उत्कर्षमा पुगेको छ। प्रमुख प्रशासकीय अधिकृत सरोज गुरागाईँ हाजिर गर्न पुगे लगत्तै उपमेयर सुनिता डंगोलले आफ्नो नेतृत्वमा महानगरको बैठक राखेकी हुन्।
तनावकाबिच अहिले बैठक बसिरहेको छ भने मेयर बालेन शाह सहभागी छैनन्। गुरागाईँलाई महानगरमा प्रवेश नै गर्न नदिने भन्दै सयौँ महानगर प्रहरी परिचालन गरिएको थियो। वडाध्यक्ष र कर्मचारीहरूले अवरोध पन्छ्याउँदै उनलाई कार्यकक्ष पुर्याएका थिए।
गुरागाईँलाई नक्सा पास विवादमा नियम विपरीत काम गरेको भन्दै पुस ७ गतेदेखि बिदामा राखिएको थियो ।
आफूहरूले तलबसमेत खान नपाएको भन्दै कर्मचारीहरू गुरागाईँको पक्षमा देखिएका छन् । महानगरमा प्रमुख प्रशासकीय अधिकृत नहुँदा पाँच महिनादेखि कर्मचारीहरूले तलब खान पाएका छैनन्।
