२२ चैत, सुदूरपश्चिम । सुदूरपश्चिम प्रदेशका मुख्यमन्त्री कमलबहादुर शाहले भ्रष्टाचारका सन्दर्भमा प्रदेश सरकार शून्य सहनशीलताको नीति लिएर अघि बढेको बताएका छन्।
जिल्ला समन्वय समिति कैलालीको आज घोडाघोडीमा आयोजित नवौँ सभामा उनले भ्रष्टाचारमा शून्य सहनशीलताका विषयमा कसैसँग सम्झौता नगर्ने प्रतिबद्धता गरे । मुख्यमन्त्रीले केही दिनअघि विवादित अडियो श्रव्य सामग्री सार्वजनिक भइसकेपछि सम्बन्धित मन्त्रीले नैतिकताका आधारमा पदबाट राजीनामा दिएको बताए ।
विवादित श्रव्य सामग्रीका सम्बन्धमा सम्बन्धित निकायले स्वतन्त्र र निष्पक्ष छानबिनलाई अगाडि बढाउनुपर्ने बताउँदै मुख्यमन्त्रीले भने, “यसमा प्रदेश सरकारको सहयोग रहन्छ, दोषी दण्डित हुनुपर्छ, उन्मुक्ति पाउनु हुँदैन ।”
अवरुद्ध भइरहेको प्रदेशसभाको बैठक सञ्चालन गराउन सर्वदलीय बैठक गरेर समस्याको सामाधान खोज्ने पहल भइरहेको उनले जानकारी दिए । उनले भने, “सदन अवरुद्ध गरेर समस्या समाधान हुँदैन, प्रतिपक्षीसँग संवाद र सहकार्य गरेर सदन सञ्चालन हुन्छ भन्नेमा म विश्वस्त छु ।”
प्रदेशसभाको अवरोध हटाउन केही दिनदेखि सत्तापक्ष र प्रतिपक्षी दलको बैठक बस्मे पनि सहमति जुट्न सकेको छैन । बैठकमा प्रतिपक्षीले अडियो प्रकरणका विषयमा घटनाको सत्यतथ्य छानबिन गर्न उच्चस्तरीय छानबिन समिति गठन गर्नुपर्ने अडान राख्दै आएका छन् ।
वनसम्बन्धी कार्यविधि बनाउँदा आर्थिक चलखेल भएको भन्ने श्रव्य सामग्री सार्वजनिक भएपछि नागरिक उन्मुक्ति पार्टीबाट उद्योग, पर्यटन, वन तथा वातावरणमन्त्री बनेका लक्ष्मणकिशोर चौधरीले केही दिनअघि पदबाट राजीनामा दिएका थिए । अख्तियार दुरुपयोग अनुसन्धान आयोगको टोलीले बिहीबार मन्त्रालयका काजगात नियन्त्रणमा लिएर अनुसन्धान प्रक्रिया अघि बढाएको छ ।
