२६ वैशाख, काठमाडौँ । नेपाल राष्ट्र बैंकको गभर्नर नियुक्ति प्रक्रियामा नेपाली कांग्रेसले आन्तरिक तयारी तीव्र पारेको छ। कार्यकारी निर्देशक गुणाकर भट्टले दिएको राजीनामा कार्यवाहक गभर्नर नीलम ढुंगानाले स्वीकृत नगरेपछि कांग्रेस नेतृत्वमा असन्तुष्टि देखिएको हो।
शेरबहादुर देउवा निवासमा बसेको पदाधिकारी बैठकमा सभापति देउवाले गभर्नर कांग्रेसकै हुने दाबी गर्दै, यदि भट्टको नाममा सहमति जुटेन भने वैकल्पिक नाम अघि सारिने संकेत दिएका छन्। ढुंगानाको अडानप्रति एमालेको भूमिका रहेको भन्दै कांग्रेस नेताहरूले असहमति जनाएका छन्।
गभर्नर नियुक्तिमा दलहरूबीच सहमति नजिकिएको बताउँदै सभापति देउवाले चाँडै टुंगो लाग्ने विश्वास दिलाएका छन्। कांग्रेसले नेतृत्वमा व्यावसायिक र सक्षम व्यक्ति ल्याउनेमा जोड दिँदै आएको छ। पार्टीभित्र चाहिएको व्यक्तिले नै गभर्नर हुनेमा नेताहरू ढुक्क देखिएका छन्।
