२९ जेठ, काठमाडौँ। नेपाल कम्युनिष्ट पार्टी (एमाले) निकट विद्यार्थी सङ्गठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) को २४औँ राष्ट्रिय महाधिवेशन बाट नयाँ नेतृत्व चयनका लागि आज मतदान सुरु भएको छ । हिजो मतदान हुने भने पनि आज मात्रै प्रक्रिया सुरु भएको हो।
अध्यक्ष पदका लागि प्रकाश पौडेल र डा. सुजन कडरिया मैदानमा रहेका छन्। उनीहरूले पहिलो मतदान गरी निर्वाचन प्रक्रियाको सुरुवात गरेका हुन्। मतदान विद्युतीय प्रणालीमार्फत भइरहेको छ। मतदान बिहान ८ बजेबाट सुरु भएको हो र यो अपराह्न ४ बजेसम्म चल्नेछ।
खुला उपाध्यक्ष पदमा विकास श्रेष्ठ, राजकुमार ढकाल, भरतसिंह धामी, धर्मेन्द्र केसी, र गणेशबहादुर शाही मैदानमा छन् । यस्तै महिला उपाध्यक्ष पदका लागि सुजिता धिताल, अञ्जना सिवाकोटी, भवानी बजगाईँ र आरती भट्टराई प्रतिस्पर्धामा छन् । महासचिव पदमा आरके रोमश, दीपक धामी र सुनिल कँडेलले उम्मेदवारी दिएका छन् ।
महाधिवेशनमा करिब एक हजार ५४३ जना प्रतिनिधिले मतदान गर्नेछन् । हाल विभिन्न पदमा ५१९ जना उम्मेदवार भएकाले एक जनालाई कम्तीमा १५ देखि २० मिनेट मतदान गर्न समय लाग्ने जनाइएको छ ।
