सुर्यखबर सम्बाददाता,
काठमाण्डौ । प्रधानमन्त्री पुष्पकमल दाहाल ‘प्रचण्ड’सँग सोसलिस्ट पार्टी अफ बङ्गलादेशका जनरल सेक्रेटरी खालेकुजमन नेतृत्वको प्रतिनिधिमण्डलले शिष्टाचार भेट गरेको छ ।
प्रधानमन्त्रीको सरकारी निवास बालुवाटारमा आज भएको सो भेटमा प्रधानमन्त्री दाहाल र खालेकुजमनबीच दुई देशको सम्बन्ध एवम् नेकपा माओवादी केन्द्र र सोसलिस्ट पार्टी अफ बङ्गलादेशबीचको अन्तरपार्टी सम्बन्धका बारेमा छलफल भएको थियो ।
भेटका अवसरमा प्रधानमन्त्री दाहालले नेपाल परिवर्तनका मुद्दालाई संस्थागत गर्ने चरणमा रहेको र सरकारले परिवर्तन संस्थागत गर्दै समृद्धि हासिल गर्ने कुरालाई प्राथमिकतामा राखेको बताएका उनको निजी सचिवालयले जनाएको छ ।
प्रधानमन्त्रीले राष्ट्रिय एकता बलियो पार्दै संविधान कार्यान्वयन, शान्ति प्रक्रियाको पूर्णता, पुनःनिर्माण र नवनिर्माण एवम् समृद्धिलाई सरकारले उच्च प्राथमिकतामा राखेको बताउँदै राष्ट्रिय हित र साझा सवालमा नेपाल र बङ्गलादेशबीच सम्बन्ध अझै घनिष्ट बन्ने विश्वास व्यक्त गरेका थिए।
भेटमा जनरल सेक्रेटरी खालेकुजमनले बङ्गलादेशको सोसलिस्ट पार्टीले नेपाल र नेकपा माओवादी केन्द्रसँग मैत्रीपूर्ण सम्बन्ध स्थापित गर्न चाहेको जानकारी दिँदै प्रधानमन्त्रीलाई बङ्गलादेश भ्रमणका लागि निमन्त्रणा गरेका सचिवालयले जनाएको छ । रासस
