एजेन्सी । गाम्बियाका निवर्तमान राष्ट्रपति याह्या जामेहले राजधानी बन्जुलबाट आफ्ना सरसामान, झोलीतुम्बासहित शनिबार राति नै गिनीको राजधानीतर्फ निर्वासनका लागि पलायन भएको स्थानीय सञ्चार माध्यमले जनाएका छन् ।
गाम्बियाको राजधानी बन्जुलमा रहेका सिनेगाली रेडियो समाचारदाताका अनुसार गिनीका राष्ट्रपति अल्फा कोन्डे आफ्नो निजी जेट विमानसहित बन्जुल आएका र निवर्तमान राष्ट्रपति जामेह सोही विमानमा चढी राष्ट्रपति कोन्डेसँगै गिनीको राजधानी कोनाक्राइतर्फ पलायन भएका हुन् ।
त्यस्तै, निवर्तमान राष्ट्रपति जामेहका परिवार तथा निकट समर्थकहरु पनि मौरिटानियामा दर्ता रहेको अर्को एक विमानमा चढी राजधानी बन्जुलबाट प्रस्थान गरेका छन् । जाँदाजाँदै निवर्तमान राष्ट्रपति जामेहले निजी झोलीतुम्बा भन्दै कडा सुरक्षाकाबीच थुप्रै ट्रकहरुमा टनाटन सर सामान पनि ओसारी साथमै लैजान भ्याएका छन् ।
गाम्बियामा सत्ता हस्तान्तरण सम्बन्धमा धेरै दिनसम्मको उतार–चढाव, खिँचातानी र झन्डै सुरु हुन लागेको रक्तपातपूर्ण विद्रोहपश्चात् पश्चिम अफ्रिकी राष्ट्रहरुको सङ्गठनको मध्यस्थतामा निवर्तमान राष्ट्रपति जामेहले अन्ततोगत्वा सत्तामोह त्याग गरेका हुन् ।
पश्चिम अफ्रिकी राष्ट्रहरुको संगठनका प्रतिनिधिसँगको अन्तिम वार्ता र छलफलपछि गतः शनिबार बेलुकी उनले सत्ता परित्याग गर्ने घोषणा गरेका थिए । साथै आफुविरुद्ध खनिएर आउने सम्भाव्य खतरालाई दृष्टिमा राख्दै देश छाडेर निर्वासनमा जाने निधोसमेत उनले गरेका थिए ।
निर्वासनमा जानुभन्दा केही समय अघि उनले गाम्बियाको सबै राजनीतिक समस्या शान्तिपूर्ण ढङगले सुल्झाउन सघाउने वचनवद्धता व्यक्त गरेका र यस क्रममा एक थोपा पनि रक्तपात आवश्यक नभएको बताएका थिए ।
गाम्बियामा शान्तिपूर्ण सत्ता हस्तान्तरण सम्बन्धमा मध्यस्थताका लागि पश्चिम अफ्रिकी राष्ट्रहरुको सङ्गठनको प्रतिनिधिका रुपमा आएका मौरिटानियाका राष्ट्रपति मोहम्मद औलाद अब्दुल अजिज र गिनीका राष्ट्रपति अल्फा कोन्डे राजधानी बन्जुलमै केही दिनदेखि बस्दै आएका थिए ।
