२ मंसिर, काठमाडौं । प्रधानन्यायाधीश चोलेन्द्रशमशेर जबराको राजीनामा माग्दै आन्दोलत कानुन व्यवसायीले आजपनि सर्बाेच्चमा धर्ना दिएका छन् । सर्वोच्च अदालत परिसरमा प्रदर्शनमा उत्रिएका कानुन व्यवसायीहरूमाथि आज प्रहरीले लाठीचार्ज गरेको छ । प्रधानन्यायाधीश चोलेन्द्रशमशेर जबराको राजीनामा माग्दै वकिलहरूले प्रदर्शन गरेका हुन् ।
प्रदर्शनका क्रममा वकिलहरू र प्रहरीबीच धकेलाधकेल भएको थियो । त्यसक्रममा प्रहरीले लाठी प्रहार गरेको हो । प्रहरीको लाठी प्रहारबाट नेपाल बार एसोसिएसनका अध्यक्ष चण्डेश्वर श्रेष्ठ, केन्द्रीय सदस्य प्रकाश महर्जनलगायत दर्जनौं घाइते भएका छन् ।
नेपाल बारको अगुवाइमा आन्दोलनरत कानुन व्यवसायीले आज सर्वोच्च अदालतका मूल र वैकल्पिक दुवै गेटमा धर्ना दिने तयारी गरेका छन् । केही दिनयता वकिलहरूको मूल गेटभित्रको धर्ना छल्दै प्रधानन्यायाधीश जबरा वैकल्पिक गेटबाट भित्र प्रवेश गर्दै आएका थिए ।
सर्वोच्च परिसरमा अहिले कानुन व्यवसायीहरूले प्रधानन्यायाधीशको राजीनामा माग्दै नाराबाजी गरिरहेका छन् । उनीहरूलाई रोक्न ठूलो संख्यामा प्रहरी परिचालन गरिएको छ ।
