२७ मंसिर, काठमाडौं । नेकपा एमालेका अध्यक्ष केपी शर्मा ओलीले पार्टीमाथि विभिन्न शक्तिहरूको आक्रमण भइरहेको दाबी गरेका छन्। उनले भने, “एमाले कमजोर बनाउँदा नेपाली राष्ट्रियता कमजोर हुन्छ,” र पार्टीले स्वतन्त्र र सार्वभौम राष्ट्रको अभ्यास गर्दा विरोध हुने गरेको बताए।
भक्तपुरको सल्लाघारीमा भएको पार्टीको ११औं महाधिवेशनको उद्घाटन समारोहमा ओलीले विरोधी शक्ति स्वदेशी हो वा विदेशी भन्ने स्पष्ट नगरे पनि दुवैतर्फ संकेत गरेका थिए। उनले थपे, “हामी जन्मजात श्रेष्ठताका आधारमा शासन गर्ने व्यवस्था मान्दैनौं। सबै नागरिक बराबरीमा छन् र अनिर्वाचित सत्ता स्वीकार्य छैन।”
ओलीले हिंसा वा युद्धलाई समाज परिवर्तनको साधन बनाउन नहुने स्पष्ट पार्दै भने, “जनताको समर्थनबाट शान्तिपूर्ण ढंगले पनि समाज परिवर्तन गर्न सकिन्छ, तर त्यसमा पनि प्रहार हुन्छ।” उनले विविधता र बहुलतालाई राष्ट्रिय सम्पदा बताउँदै, “विविधतामा एकता हाम्रो मुलमन्त्र हो। संविधान बनाउने र संशोधन गर्ने अधिकार हाम्रो हो, हाम्रो स्वतन्त्रता सदुपयोग गर्ने अधिकार हाम्रो हो,” भने।
अध्यक्ष ओलीले सशस्त्र द्वन्द्व, संक्रमणकाल र भूकम्पजस्ता चुनौतीको बाबजुद मुलुक प्रगतिको बाटोमा रहेको दाबी गरे। उनले भने, “हामी कमजोर भए मात्र नेपालको राष्ट्रिय स्वाधीनता कमजोर हुन्छ। हाम्रो शीर नझुकेसम्म स्वाधीनता ढल्दैन।”
ओलीले एमालेविरुद्ध विभिन्न रङमा विरोधी शक्ति देखा पर्नु, असन्तुष्टि पोख्नु, परिवर्तनको नारा बोकेको देखिनु, र ‘कलर रिभोलुसन’ जस्ता गतिविधि उस्तै उद्देश्यका हुने बताए। संविधान जारी गर्दा अडान लिनु, पारबहन सम्झौता, उत्तर–दक्षिण जोड्ने कनेक्टिभिटी, सीमा रक्षा र आफ्नै भूभागको दाबी गर्दा पनि पार्टी प्रहारको निशानामा परेको उनले बताए।
यो सम्बोधनमा ओलीले आफ्नो पार्टीको राष्ट्रिय स्वाधीनता र सार्वभौमिकता सुनिश्चित गर्न दृढ रहने प्रतिबद्धता व्यक्त गरे।
