१५ जेठ, काठमाडौं । सडक निर्माणमा चरम ढिलाइ भएपछि स्थानीय बासिन्दाले विरोधस्वरूप पूर्वपश्चिम राजमार्ग अवरुद्ध गरेका छन्। वर्षौंदेखि निर्माण अधुरै रहँदा धुलो, हिलो र जोखिमपूर्ण यात्राबाट आजित बनेका स्थानीयले सडक अवरुद्ध गर्दै निर्माण कार्य तत्काल सम्पन्न गर्न माग गरेका हुन्।
स्थानीयको प्रदर्शनका कारण राजमार्गमा सवारी आवागमन प्रभावित भएको छ। प्रदर्शनकारीहरूले निर्माण कम्पनी र सम्बन्धित निकायको लापरवाहीका कारण सर्वसाधारणले सास्ती भोग्नुपरेको आरोप लगाएका छन्।
निर्माणमा ढिलाइ हुँदा आयोजनाको लागतसमेत बढ्दै गएको बताइएको छ। प्रारम्भिक लागतभन्दा झण्डै ३ अर्ब रुपैयाँ बढी खर्च भइसकेको परियोजनामा हालसम्म सडकमा कालोपत्रे गर्ने काम मात्रै सम्पन्न भएको जनाइएको छ।
