२२ कात्तिक, काठमाडौं । टर्कीले गाजा क्षेत्रमा जनसंहार र मानवताविरुद्ध अपराध गरेको आरोपमा इजरायलका प्रधानमन्त्री बेन्जामिन नेतान्याहुसहित ३७ जनामाथि गिरफ्तारी वारेन्ट जारी गरेको छ। इस्तानबुल अभियोजक कार्यालयले शुक्रबार यो कदम उठाएको एएफपी र बीबीसीले जनाएका छन्।
वारेन्टमा इजरायलका रक्षामन्त्री इजराइल काट्ज, राष्ट्रिय सुरक्षा मन्त्री इतेमार बेन गभिर, र सेना प्रमुख लेफ्टिनेन्ट जनरल एयाल जामिरको नाम पनि समावेश गरिएको बताइएको छ। टर्की सरकारका अनुसार इजरायलले गाजामा “व्यवस्थित रूपमा जनसंहार” गरेको छ।
यो घटनालाई लिएर टर्कीले कठोर कारबाहीको माग गर्दै अन्तर्राष्ट्रिय ध्यान आकर्षित गरेको हो। तर, इजरायलले टर्कीको आरोपलाई अस्वीकार गर्दै कडा प्रतिक्रिया दिएको छ। इजरायलका विदेशमन्त्री गिदोन सारले टर्कीका राष्ट्रपति रेचेप तैय्यप एर्दोआनलाई तानाशाह भन्दै यो कदमलाई “राजनीतिक प्रचारको हिस्सा” भनेका छन्।
