१५ पुस, काठमाडौं । निर्वाचन आयोगले आगामी प्रतिनिधि सभा निर्वाचनका लागि मतपत्र छपाइ प्रक्रिया अघि बढाएको छ। सुरुमा समानुपातिकतर्फ र त्यसपछि प्रत्यक्षतर्फको मतपत्र छापिनेछ।
भक्तपुरको सानोठिमीस्थित जनक शिक्षा सामग्री केन्द्रको छापाखानामा मतपत्र छाप्ने काम हुँदैछ। निर्वाचन आयोगले पुस १६ गतेदेखि मतपत्र छाप्ने तालिका निर्धारण गरेको थियो।
निर्वाचन आयोगका सहायक प्रवक्ता कुलबहादुर जीसीले समानुपातिकतर्फ भाग लिने राजनीतिक दल र निर्वाचन चिह्न निश्चित भइसकेको बताउँदै भने, “५८ दल र ६४ चुनाव चिह्न एकिन भइसकेकाले सुरुमा समानुपातिकको मतपत्र छाप्ने काम हुन्छ।”
फागुन २१ गते तोकिएको प्रतिनिधि सभा निर्वाचनका लागि कुल १ करोड ९० लाख ५ हजार ३२४ मतदाता नामावली संकलन तथा अद्यावधिक गरिएको छ। आयोगको नीति अनुसार समानुपातिकतर्फ कुल मतदाताको १० प्रतिशत अतिरिक्त मतपत्र छापिनेछ।
समानुपातिक मतपत्र छाप्ने काम २०–३० दिन लाग्ने अनुमान गरिएको छ। यसपछि मात्र प्रत्यक्षतर्फको मतपत्र छाप्ने प्रक्रिया सुरु हुनेछ। सहायक प्रवक्ता जीसीले बताएअनुसार प्रत्यक्षतर्फको मतपत्र हरेक निर्वाचन क्षेत्र अनुसार फरक हुनेछ, किनभने उम्मेदवारको सहभागिता र निर्वाचन चिह्न क्षेत्र अनुसार भिन्न हुने भएकाले मतपत्र पनि सोही अनुसार छापिनु पर्नेछ।
प्रत्यक्षतर्फको मतपत्र छपाइ भने उम्मेदवारको अन्तिम नामावली प्रकाशित भइसकेपछि मात्रै सुरु हुनेछ।
