२७ फागुन, काठमाडौं । प्रतिनिधिसभाको समानुपातिक मतगणना सकिएसँगै यो चुनावका केही रोचक तथ्यहरू बाहिर आएका छन्। देशव्यापी रूपमा रास्वपा पहिलो दल बनेको देखिएको छ भने, कोशी प्रदेशमा भने मत वितरणले केही अनपेक्षित परिणाम देखाएको छ।
चार महिना अघि गठन भएको श्रम संस्कृति पार्टी पहिलो चुनावमै राष्ट्रिय पार्टीको दर्जा पाएको छ। यसले प्रत्यक्षमा ३ सिट जित्दा, समानुपातिक मतमा करिब ४ सिट जित्ने स्थिति बनाएको छ। कोशी प्रदेशमा समानुपातिक मतको परिणाम हेर्दा रास्वपा पहिलो, श्रम संस्कृति दोस्रो, कांग्रेस तेस्रो र एमाले चौथो स्थानमा रहेको छ।
रास्वपाले प्रदेशबाट ८ लाख ५३ हजार १ सय ८४ मत प्राप्त गरेको छ भने श्रम संस्कृतिले २ लाख ९२ हजार ४९ मत पाएको छ। विशेषत, श्रम संस्कृतिले देशभर पाएको ३ लाख ८५ हजार ६ सय ७९ मतमध्ये दुई तिहाइ भन्दा बढी मत कोशीबाट आएको छ। यसले पार्टीले यस प्रदेशमा कांग्रेस, एमाले र नेकपालाई चुनौती दिएको स्पष्ट देखाएको छ।
कांग्रेसले २ लाख ९० हजार ५६२ मत र एमालेले २ लाख ८८ हजार १ सय ८६ मत पाएको छ। नेकपा ९७ हजार ६ सय ७९ मतसहित पछाडि परेको छ। प्रत्यक्ष सिटमा श्रम संस्कृतिले खोटाङ, धरान र भोजपुरमा ३ सिट जितेको छ। विशेषत खोटाङ र भोजपुरमा समानुपातिक मतमा पनि सर्वाधिक मत पाएको दल श्रम संस्कृति बनेको छ।
पाँचथरमा कांग्रेसले प्रत्यक्ष सिट जितेको भए पनि समानुपातिक मतमा श्रम संस्कृति पहिलो दल बनेको देखिन्छ। यसले कोशी प्रदेशमा नयाँ राजनीतिक समीकरण निर्माण भएको संकेत दिएको छ।
