८ चैत, काठमाडौं । नेपाली कांग्रेसभित्रको आन्तरिक विवाद थप चर्किँदै गएको छ। पार्टीको विशेष महाधिवेशनबाट निर्वाचित केन्द्रीय कार्यसमितिको बैठक सानेपास्थित केन्द्रीय कार्यालयमा चलिरहँदा संस्थापन पक्ष र असन्तुष्ट समूहबीच मतभेद स्पष्ट देखिएको हो।
पार्टी सभापति शेरबहादुर देउवा र नेता शेखर कोइराला निकट समूहले पुरानो केन्द्रीय समितिको बैठक बोलाउने निर्णय गरेका छन्। नेता मीनबहादुर विश्वकर्माका अनुसार आइतबार बिहान पूर्णबहादुर खड्काको संयोजकत्वमा कार्यसम्पादन समितिको बैठक बसेको थियो।
धुम्बाराहीमा सम्पन्न उक्त बैठकले छिट्टै केन्द्रीय समितिको बैठक बोलाउने निर्णय गरेको बताइएको छ। बैठकको मिति र समय खड्काले अन्य नेतासँग परामर्श गरी तय गर्ने जनाइएको छ।
यसैबीच, उक्त समूहले आगामी बैठकमा सभापति गगनकुमार थापा र उपसभापति विश्वप्रकाश शर्मालाई नबोलाउने निर्णय गरेको छ। यसअघि खड्काको अध्यक्षतामा बसेको बैठकले उनीहरूमाथि कारबाही गरेको थियो।
असन्तुष्ट समूहले विशेष महाधिवेशनविरुद्ध अदालतमा मुद्दा दायर गरेको छ। मुद्दा विचाराधीन अवस्थामा रहेकाले अन्तिम फैसला नआउँदासम्म पार्टीभित्र गतिविधि जारी रहने उनीहरूको भनाइ छ।
बैठकमा शशांक कोइराला, प्रकाशमान सिंह, विमलेन्द्र निधि, विजय गच्छदार, बालकृष्ण खाण, ज्ञानेन्द्रबहादुर कार्की, प्रकाशशरण महत, मिनेन्द्र रिजाल, धनराज गुरुङ, जीवन परियार र बद्री पाण्डे लगायतका नेताहरू सहभागी रहेका थिए।
