चैत ११, काठमाडौं । पूर्वप्रधानमन्त्री केपी शर्मा ओलीले भदौ २३ गते भएको हिंसात्मक घटनामा सुनियोजित रूपमा उत्तेजना फैलाइएको दाबी गरेका छन्। जेनजी आन्दोलनका क्रममा भएको उक्त घटनामा युवाहरूको ज्यान जाने अवस्था सिर्जना हुनुमा केही समूहको योजनाबद्ध भूमिका रहेको उनले बताएका हुन्।
गौरीबहादुर कार्की नेतृत्वको आयोगलाई दिएको बयानमा ओलीले आन्दोलनलाई भड्काउन बाह्य घुसपैठ भएको आरोप लगाए। उनका अनुसार शान्तिपूर्ण रूपमा सुरु भएको आन्दोलनलाई केही तत्वहरूले आफ्नो स्वार्थका लागि प्रयोग गर्दै हिंसात्मक बनाएका थिए।
ओलीले संसद भवन, सिंहदरबार र सर्वोच्च अदालतजस्ता राज्यका प्रमुख संरचनामाथि भएको आक्रमणलाई पनि योजनाबद्ध घटना भएको बताएका छन्। उनले ती स्थानहरूमा खोजी–खोजी आगजनी गरिएको र त्यसमा संलग्नहरूको पहिचान हुनुपर्ने उल्लेख गरेका छन्।
उनका अनुसार प्रधानमन्त्रीको रूपमा आफूले सुरक्षा निकायलाई न्यूनतम बल प्रयोग गर्न र मानवीय क्षति कम गर्न निर्देशन दिएका थिए। साथै, प्रहरीलाई सीधा गोली चलाउने आदेश दिने अधिकार प्रधानमन्त्रीसँग नहुने स्पष्ट पारे।
घटनापछि सरकारले निष्पक्ष छानबिनका लागि न्यायिक आयोग गठन गर्ने, घाइतेहरूको उपचार गर्ने र मृतकका परिवारलाई राहत दिने निर्णय गरेको पनि उनले बताएका छन्। साथै, आन्दोलनको मागअनुसार सामाजिक सञ्जालमाथि लगाइएको प्रतिबन्ध हटाइएको जानकारी दिए।
ओलीले भदौ २४ गते आफ्नो राजीनामा दिएको उल्लेख गर्दै आफ्नो राजीनामापछि पनि अवस्था सामान्य नभएको तर्क गरे। उनले सामाजिक सञ्जाल नियमन आवश्यक रहेको धारणा समेत व्यक्त गरेका छन्।
उक्त घटनासम्बन्धी आयोगको प्रतिवेदन भने हालसम्म सार्वजनिक गरिएको छैन।
