१४ चैत, काठमाडौं । नेपाली कांग्रेसले भदौ २३ र २४ गतेको दमनबारे बनाइएको आयोगको प्रतिवेदन कार्यान्वयन सरकारको ‘सेलेक्टिभ’ निर्णय भएको निष्कर्ष निकालेको छ। पार्टीले शनिबार संसदीय सचेतना कार्यक्रमपछि जारी विज्ञप्तिमा आयोगले सिफारिस गरेका सुरक्षा निकायको कार्यान्वयन अगाडि बढाइए पनि अन्य सिफारिस हतारमा लागू गरिएको भन्दै आलोचना गरेको हो।
कांग्रेस प्रवक्ता देवराज चालिसेले सरकारी व्यवहार आग्रहपूर्ण देखिएको भन्दै बताए, “हामीले सडक आन्दोलन वा अन्य विरोधका कार्यक्रमहरू तय गरेका छैनौं। हाम्रो लक्ष्य सरकारको निष्पक्षता र कानूनी प्रक्रिया सुनिश्चित गर्नु हो।”
पार्टीले भदौ २४ को घटनाबारे अनुसन्धान नभएकोमा पनि आपत्ति जनाएको छ। चालिसेले भने, “२४ गतेको आगजनी र विध्वंशमा संलग्न व्यक्तिहरू को हुन् भन्ने कुरा जनताले जान्नुपर्छ। त्यसमा कारबाही हुनु आवश्यक छ, तर त्यसका लागि कानुनी प्रक्रिया पालना हुनुपर्छ।”
कांग्रेसले सरकारलाई चेतावनी दिँदै भन्यो, हतारमा गरिएको निर्णयले कानूनको शासन कमजोर हुनसक्छ र देश पुन: द्वन्द्व तथा अस्थिरतातर्फ धकेलिन सक्छ। पार्टीको धारणा अनुसार भदौ २३ र २४ को घटनामा संलग्न जोसुकै भएपनि कानुनी प्रक्रिया अनुसार कारबाही हुनुपर्छ र कांग्रेसले त्यसमा सहयोग गर्ने प्रतिबद्धता जनाएको छ।
यसैगरी, पार्टीले सरकारलाई संयमित र परिपक्व भएर काम गर्न आग्रह गर्दै घटनाको निष्पक्ष अनुसन्धान र पारदर्शी कार्यान्वयन सुनिश्चित गर्न जोड दिएको छ।
