६ बैशाख, काठमाडौं । पछिल्लो समय नेपालमा केराको मूल्य उल्लेख्य रूपमा बढेको छ। भारतीय केराको आयातमा सरकारले रोक लगाएपछि बजारमा आपूर्ति घट्दा मूल्य आकाशिएको व्यवसायीहरू बताउँछन्।
हाल दाङमा केराको मूल्य प्रतिदर्जन करिब २०० रुपैयाँ पुगेको छ भने काठमाडौंमा यही मूल्य ३०० रुपैयाँसम्म पुगेको छ। उपभोक्ताका लागि केरा महँगो बन्दै गए पनि किसानका लागि भने यो अवस्था लाभदायक देखिएको छ।
किसानहरूले उत्पादन गरेको केरा बोटमै प्रतिदर्जन करिब १०० रुपैयाँमा बिक्री भइरहेको छ। अघिल्लो वर्ष बजार अभावका कारण बारीमै कुहिन बाध्य भएका किसानहरू यस वर्ष भने राम्रो मूल्य पाउँदा उत्साहित छन्।
व्यवसायीहरूका अनुसार आयात रोकिएपछि स्वदेशी उत्पादनको माग बढेको हो। तर मूल्य वृद्धिले उपभोक्तामा दबाब परेको छ। बजार सन्तुलनका लागि दीर्घकालीन नीति आवश्यक रहेको सरोकारवालाहरूको भनाइ छ।
