२७ वैशाख, काठमाडौं । त्रिभुवन अन्तर्राष्ट्रिय विमानस्थल अध्यागमनमा भएको भनिएको घुस प्रकरणमा तत्कालीन गृहमन्त्री रमेश लेखक र गृहसचिव गोकर्णमणि दुवाडी लगायतमाथि मुद्दा नचल्ने भएको छ ।
अख्तियार दुरुपयोग अनुसन्धान आयोगले अनुसन्धानपछि उनीहरूविरुद्ध पर्याप्त प्रमाण नपाइएको निष्कर्ष निकाल्दै फाइल बन्द गरेको हो ।
अख्तियारका अनुसार सहसचिव तिर्थराज भट्टराईविरुद्ध भ्रष्टाचार मुद्दा दायर भए पनि तत्कालीन गृहमन्त्री लेखक, गृहसचिव दुवाडी तथा अन्य उच्चपदस्थ अधिकारीहरूसँग घुस वा लाभ लिएको कुनै प्रमाण भेटिएको छैन ।
अख्तियारले २०७४ सालमा विशेष अदालतको निर्देशनअनुसार फरक–फरक घटनाक्रमका आधारमा अनुसन्धान अघि बढाएको थियो । अनुसन्धान क्रममा भिजिट भिसा प्रकरणमा संगठित मिलेमतोको आशंका गरिएको भए पनि गहिरो छानबिनपछि मुख्य राजनीतिक तथा प्रशासनिक नेतृत्वमाथि प्रमाण नपाइएको निष्कर्षमा पुगेको हो ।
यसअघि सहसचिव भट्टराई पक्राउ परेपछि अध्यागमनमा भिजिट भिसा पठाउने क्रममा घुसको संयन्त्र बनेको आरोप सार्वजनिक भएको थियो । सोही प्रकरणमा केही कर्मचारीमाथि भने भ्रष्टाचार मुद्दा अघि बढाइएको छ ।
अख्तियारले विशेष अदालतलाई पठाएको विवरणमा तत्कालीन उच्च अधिकारीहरूको संलग्नताको आशंका उल्लेख भए पनि अनुसन्धानका क्रममा कुनै गैरकानुनी लेनदेन पुष्टि हुन नसकेको स्पष्ट पारेको छ ।
