२३ साउन, काठमाडौं । संघीय मामिला तथा सामान्य प्रशासनमन्त्री भगवती न्यौपानेले निजामती कर्मचारीको प्रशिक्षणलाई सङ्ख्यात्मक मात्र नभएर गुणस्तरीय बनाउन निर्देशन दिएकी छन् ।
नेपाल प्रशासनिक प्रशिक्षण प्रतिष्ठानको परिषद बैठकलाई शुक्रबार सम्बोधन गर्दै उनले यस्तो निर्देशन दिएकी हुन्।
मन्त्री न्यौपानेले प्रशिक्षणलाई प्रविधिमैत्री र गुणस्तरीय बनाउनुपर्नेमा जोड दिएकी छन्। प्रशिक्षणमा सेल्फ लर्निङ, इलर्निङ र एआइलाई जोड दिनुपर्नेमा उनको भनाइ छ । निजामती कर्मचारीलाई प्रशिक्षणसँगै स्थलगत रुपमा अध्ययन गर्ने वातावरण बनाउनुपर्ने मन्त्री न्यौपानेले बताएकी हुन् ।बैठकमा राष्ट्रिय योजना आयोगका उपाध्यक्ष, लोकसेवा आयोगका उपाध्यक्ष, त्रिभुवन विश्वविद्यालयका उपकुलपती, नेपाल सरकारका मुख्य सचिव, संघीय मामिला तथा सामान्य प्रशासन मन्त्रालयका सचिव र अर्थमन्त्रालयका सचिवलगायत विशिष्ट व्यक्तिहरुको उपस्थिति थियो ।
सोही बैठकमा नेपाल प्रशासनिक प्रशिक्षण प्रतिष्ठानको पञ्चवर्षीय रणनीतिक योजना (२०७९/०८०–२०८३/०८४) को तेस्रो वार्षिक प्रगति समिक्षा, प्रतिष्ठानको आर्थिक वर्ष २०८१/०८२ को वार्षिक प्रगति समीक्षा तथा प्रतिष्ठानको आर्थिक वर्ष २०८२/०८३ को नीति तथा कार्यक्रम र बजेटका सम्बन्धमा छलफल भएको थियो । 
