२५ मंसिर, काठमाडौं । निवर्तमान मुख्यसचिव एकनारायण अर्यालले भदौ २३ मा जेनजी आन्दोलनका क्रममा गोली चल्नुमा सहभागीहरूकै जिम्मेवारी रहेको दाबी गरेका छन्।
सर्वोच्च अदालतमा पेश गरेको लिखित जवाफमा उनले आन्दोलन शान्तिपूर्ण नभएर निषेधित सरकारी क्षेत्रमा प्रवेश गर्ने प्रयास गरेकाले सुरक्षाकर्मीले बल प्रयोग गर्नुपरेको उल्लेख गरेका छन्।
अर्यालले चार जना प्रतिनिधि अंकित मल्ल, सुधन गुरुङ, सवल गौतम र पुरुषोत्तम यादव सांकेतिक रुपमा जिम्मेवार भएको बताए। उनका अनुसार, उनीहरूले अनुमति लिएर कार्यक्रम गर्ने भनिएका भए पनि एभरेष्ट होटलको पूर्वतर्फ जान नहुनेमा अन्तर्राष्ट्रिय सम्मेलन केन्द्रतर्फ अघि बढे, जसले सुरक्षाकर्मी र सरकारी सम्पत्तिको सुरक्षा चुनौतीपूर्ण बनाएको थियो।
मुख्यसचिवले शान्ति सुरक्षा सुनिश्चित गर्न सुरक्षाकर्मीले आफ्नो हतियारको रक्षा गर्नुपर्ने आवश्यकतामा बल प्रयोग भएको र कानून विपरीत कार्यलाई कानूनी दायरामा ल्याउनुपर्ने उल्लेख गरेका छन्।
