काठमाडौं, २६ फागुन । न्याय परिषद्ले सर्वोच्च अदालतको आगामी प्रधानन्यायाधीश नियुक्तिका लागि ६ जना न्यायाधीशको नाम सिफारिस गरेको छ। परिषद्को बैठकले हालका प्रधानन्यायाधीश प्रकाशमानसिंह राउतको अवकाशपछि नियुक्त हुने नयाँ प्रधानन्यायाधीशका लागि योग्य न्यायाधीशहरूको सूची तयार पारेको हो।
प्रधानन्यायाधीश राउत ६५ वर्षे उमेरहदका कारण आगामी १८ चैतमा अवकाश हुँदैछन्। सोही कारण परिषद्ले समयमै नयाँ प्रधानन्यायाधीश नियुक्तिको प्रक्रिया अगाडि बढाउन सिफारिस गरेको जनाएको छ।
सिफारिस सूचीमा सर्वोच्च अदालतका वरिष्ठतम् न्यायाधीश सपना प्रधान मल्लसहित न्यायाधीश कुमार रेग्मी, हरि फुँयाल, डा. मनोजकुमार शर्मा, डा. नहकुल सुवेदी र तिलप्रसाद श्रेष्ठ रहेका छन्। सर्वोच्च अदालतमा कम्तीमा तीन वर्ष सेवा अवधि पूरा गरेका न्यायाधीशहरू प्रधानन्यायाधीश बन्नका लागि योग्य हुने कानुनी व्यवस्था छ।
परम्पराअनुसार प्रधानन्यायाधीश अवकाश हुनुभन्दा करिब एक महिना अघि नै सम्भावित उम्मेदवारहरूको नाम सिफारिस गर्ने अभ्यास रहेको छ। यद्यपि अन्तिम निर्णय भने संवैधानिक परिषद्ले गर्नेछ।
संवैधानिक परिषद्को सिफारिसपछि प्रस्तावित प्रधानन्यायाधीश संसदीय सुनुवाइ समितिबाट अनुमोदन भएमा मात्र नियुक्त हुने संवैधानिक व्यवस्था रहेको छ।
यसबीच हालै सम्पन्न प्रतिनिधिसभा निर्वाचनका कारण सभामुख, उपसभामुख तथा प्रमुख विपक्षी दलका नेताको टुंगो नलागेकाले संवैधानिक परिषद्ले पूर्णता पाउन बाँकी रहेको छ।
