५ वैशाख, काठमाडौं । नेपाली कांग्रेसको आन्तरिक आधिकारिकता विवादमा सर्वोच्च अदालतले महत्वपूर्ण फैसला सुनाएपछि पार्टीभित्र राजनीतिक गतिविधि तीव्र बनेको छ। अदालतको निर्णयपछि निवर्तमान कार्यवाहक सभापति पूर्णबहादुर खड्काले आफ्ना पक्षका शीर्ष नेताहरूसँग छलफल सुरु गरेका छन्।
खड्काले गोल्फुटारस्थित आफ्नै निवासमा पूर्वपदाधिकारी, निवर्तमान केन्द्रीय समितिका पदाधिकारी तथा केन्द्रीय सदस्यहरूलाई बोलाएर बैठक गरिरहेका छन्। बैठकमा पूर्वउपसभापति विमलेन्द्र निधि, पूर्वमहामन्त्रीहरू डा. शशांक कोइराला, कृष्णप्रसाद सिटौला, प्रकाशमान सिंहसहित एनपी साउद, मीन विश्वकर्मा, रमेश लेखक लगायत नेताहरू सहभागी छन्।
यद्यपि, डा. शेखर कोइराला र उनका पक्षधर नेताहरू भने उक्त बैठकमा सहभागी भएका छैनन्, जसले पार्टीभित्रको ध्रुवीकरण अझ स्पष्ट बनाएको छ।
यसअघि सर्वोच्च अदालतले निर्वाचन आयोगको निर्णयलाई सदर गर्दै विशेष महाधिवेशनबाट चयन भएको गगन थापा नेतृत्वको कार्यसमितिलाई आधिकारिकता दिएको थियो। उक्त निर्णयविरुद्ध १४औँ महाधिवेशनबाट निर्वाचित सभापति शेरबहादुर देउवा र कार्यवाहक सभापति खड्काले दायर गरेको रिट खारेज भएपछि खड्का–देउवा समूह दबाबमा परेको छ।
सर्वोच्चको फैसला आफ्नो पक्षमा नआएपछि खड्का समूहले यसलाई ‘अनपेक्षित’ भन्दै औपचारिक प्रतिक्रिया तयारी गरिरहेको छ। स्रोतका अनुसार आजको छलफलपछि भोलि आइतबार समूहले आफ्नो आधिकारिक धारणा सार्वजनिक गर्ने तयारी गरेको छ।
राजनीतिक विश्लेषकहरूका अनुसार यो घटनाक्रमले नेपाली कांग्रेसभित्र शक्ति सन्तुलनमा महत्वपूर्ण परिवर्तन ल्याउन सक्ने देखिएको छ।
