९ मंसिर, काठमाडौं । मंगलबार सेयर बजार परिसूचक नेप्से ५.३२ अंकले उक्लिएर २६५५ अंकमा पुगेको छ। लगातार तीन दिनदेखि बजार हरियो अवस्थामा बन्द हुँदै आएको छ।
सूचक बढेपनि कारोबार रकम भने घटेको छ। अघिल्लो दिन ७ अर्ब ३ करोडको कारोबार भएको बजारमा आज ५ अर्ब ८२ करोडमा झरेको छ।
आज १२२ कम्पनीको मूल्य बढ्दा १२५ कम्पनी घटे र १० स्थिर रहे। दिनभर हल्का उतार–चढाव भए पनि बजार अन्ततः सकारात्मक ठाउँमै बन्द भएको छ।
समूहगत सूचकमा मिश्रित चलायमानता देखिँदा होटल तथा पर्यटन समूह १.४ प्रतिशतले उकालो लाग्दै सबैभन्दा बढी बढ्ने क्षेत्र बन्यो। उत्पादन तथा प्रशोधन समूह १.३० प्रतिशत, व्यापार १.३३ प्रतिशतले घट्दा जीवन बीमा र विकास बैंक समूह पनि रातामै रहे।
तीन कम्पनी—झापा इनर्जी, सागर डिस्टिलरी र श्रीनगर एग्रिटेक—को मूल्य १० प्रतिशतले बढ्दै ‘सर्किट हिट’ भएको छ। स्वस्तिक लघुवित्त, बन्दीपुर केबुलकार, दरामखोला हाइड्रो र हिमस्टार ऊर्जा पनि उल्लेख्य रूपमा उक्लिए।
जोशी हाइड्रोपावर ४.९६ प्रतिशतले घट्दै आजको सबैभन्दा कमजोर प्रदर्शनकर्ता बन्यो।
सबैभन्दा धेरै कारोबार भएका कम्पनीमा बन्दीपुर केबुलकार, हिमालयन रिइन्स्योरेन्स, ङादी ग्रुप, युनियन हाइड्रोपावर र शिवम् सिमेन्ट रहेका छन्।
