२१ पुस, काठमाडौं । काठमाडौं उपत्यकाका तीन प्रमुख मालपोत कार्यालयका प्रमुख सरुवा भएका छन्। सरकारले ललितपुर मालपोत कार्यालयका प्रमुख अशोककुमार भट्टराई, भक्तपुरका माधव घिमिरे र काठमाडौंको चाबहिलका दीपेन्द्र खत्रीलाई सरुवा गरेको जनाएको छ।
सरकारले उनीहरुलाई सामान्य प्रशासन मन्त्रालयमा स्थानान्तरण गरेको छ। भूमि, सहकारी तथा गरिबी निवारणमन्त्री प्रा.डा. कुमार इङनामले केही समयअघि ती कार्यालयहरुको अनुगमन गरेका थिए। अनुगमनका क्रममा, कार्यालय प्रमुखहरुले बिचौलियाहरुसँग साँठगाँठ गरेको आरोपसहित उनीहरुलाई हटाइएको मन्त्रालय स्रोतले बताएको छ।
उनीहरु पूर्वमा केपी शर्मा ओली नेतृत्वको सरकारले मन्त्री बलराम अधिकारीको पालामा ती कार्यालयमा प्रमुखका रूपमा नियुक्त भएका थिए। हालको सरकारले बिचौलियासम्बन्धी उजुरी र कार्यालयमा हुने अनियमितताका आधारमा उनीहरुको सरुवा गरेको हो।
मन्त्रालयका अनुसार, उपत्यकाका यी कार्यालयमा बिचौलियाको क्रियाकलाप हुने गरेको र कर्मचारीहरुको संलग्नता हुने गरेको गुनासो बारम्बार उठ्दै आएको छ।
