काठमाडौं, २७ फागुन । बुधबार सेयर बजारमा लगातार दोश्रो दिन गिरावट देखियो। नेप्से परिसूचक ४६.७८ अंकले घटेर २७९६ मा पुगेको छ। बजार खुलेको पहिलो घण्टामा उतारचढाव भए पनि त्यसपछि निरन्तर ओरालोमा रह्यो।
सोमबार नेगेटिभ सर्किट ब्रेक लाग्नु अघि नेप्से २८७५ अंकमा पुगेको थियो। त्यसयता दुई दिनमा बजार ७९ अंकले घटेको छ।
आज ३४ कम्पनीको शेयर मूल्य बढ्दा २२५ कम्पनीको मूल्य घट्यो भने ३ कम्पनीको मूल्य स्थिर रह्यो। कारोबार रकम पनि २१ अर्ब ५० करोड रुपैयाँबाट घटेर १३ अर्ब १८ करोडमा सीमित भयो, करिब ३८ प्रतिशतले गिरावट आएको छ।
व्यापार समूह सबैभन्दा धेरै ३.४ प्रतिशतले ओरालोमा रह्यो। अन्य समूहका गिरावट यस्ता छन्: बैंकिङ १.८२%, विकास बैंक १.६१%, फाइनान्स २.०८%, होटल तथा पर्यटन १.५६%, हाइड्रोपावर ०.७१%, लगानी १.८७%, जीवन बीमा १.९८%, उत्पादन तथा प्रशोधन १.४३%, माइक्रोफाइनान्स १.६४%, निर्जीवन बीमा ०.९७% र अन्य समूह १.८३%।
आज साल्पा विकास बैंक र नेसनल हाइड्रोपावरका शेयर मूल्य १० प्रतिशतले बढे। रिलायन्स स्पिनिङ मिल्स ९.३३% र रिडी पावर ५.७२%ले बढेका छन्। कालिका पावर सबैभन्दा ठूलो गिरावटमा रह्यो, ८.४७% घट्यो। पन्चकन्या माइ हाइड्रोपावर ५.७७%, थ्रीस्टार हाइड्रोपावर ५.३७% र ट्रेड टावर ४.४७%ले मूल्य घटाएका छन्।
धेरै कारोबार भएका कम्पनीमा रिडी पावर, आँखुखोला जलविद्युत्, नेसनल हाइड्रोपावर, अपी पावर र ङादी ग्रुप प्रमुख छन्।
