चैत ३, काठमाडौं । इजरायल काट्ज ले इरानका वरिष्ठ सुरक्षा अधिकारी अली लारीजानी को मृत्यु भएको दाबी गरेका छन्। उनले विज्ञप्ति जारी गर्दै इरानका उच्च तहका एक सुरक्षा अधिकारीको मृत्यु भएको जानकारी आफूले पाएको बताएका हुन्।
तर इरानी सञ्चारमाध्यम तस्निम समाचार एजेन्सी र मेहर समाचार एजेन्सी ले भने लारीजानी जीवित रहेको र उनले छिट्टै सन्देश जारी गर्ने बताएका छन्। यसले घटनाबारे अझै अन्योल कायम रहेको देखिन्छ।
अलजजिरा का अनुसार पछिल्ला केही घण्टामा तेहरान सहित अह्वाज, इस्फाहान र सिराज मा ठूला विस्फोटका आवाज सुनिएका छन्। राजधानीका महत्वपूर्ण संरचनासँगै लारीजानी र बासिज बलका कमाण्डरमाथि पनि आक्रमण भएको जानकारी आएको छ।
इजरायली सेना इजरायल डिफेन्स फोर्सेस (आईडीएफ) का एक अधिकारीले लारीजानीलाई निशाना बनाइएको बताएका छन्, तर उनी मारिएका हुन् वा घाइते भन्ने अझै स्पष्ट भएको छैन।
यसअघि सोमबार लारीजानीले सार्वजनिक गरेको पत्रमा मुस्लिम देशका सरकारहरूको आलोचना गरेका थिए। उनले इरानलाई सहयोग नगरेको भन्दै इस्लामिक राष्ट्रहरूमाथि असन्तुष्टि व्यक्त गरेका थिए।
बासिज बलका कमाण्डर को हुन्?
इजरायलले घोलमरेजा सोलेमानी को आक्रमणमा मृत्यु भएको दाबी गरेको छ। तर यसबारे इरानले आधिकारिक प्रतिक्रिया दिएको छैन।
सन् १९६४ मा जन्मिएका सोलेमानी युवावस्थामै इस्लामिक रिभोलुसनरी गार्ड कोर्प्स (आईआरजीसी) मा प्रवेश गरेका थिए। इरान–इराक युद्ध का क्रममा उनले बटालियन कमाण्डरको रूपमा सेवा गरेका थिए र पछि विभिन्न सैन्य इकाइहरूको नेतृत्व गर्दै उक्लिँदै गए।
सन् २०१९ देखि उनी आईआरजीसी अन्तर्गतको अर्धसैनिक स्वयंसेवक समूह ‘बासिज बल’ का प्रमुख थिए। करिब ४ लाख ५० हजार सदस्य रहेको अनुमान गरिएको यस बलको नेतृत्वका कारण उनी इरानको आन्तरिक सुरक्षामा अत्यन्त प्रभावशाली व्यक्ति मानिन्थे।
सोलेमानीमाथि संयुक्त राज्य अमेरिका, युरोपेली संघ, बेलायत र क्यानडा लगायतले प्रतिबन्ध लगाएका छन्।
घटनाको वास्तविक अवस्था अझै स्पष्ट नभएको र विभिन्न पक्षबाट विरोधाभासी दाबी आएका कारण क्षेत्रीय तनाव थप बढ्ने सम्भावना देखिएको छ।
