१५ चैत, काठमाडौं । नेपाली कांग्रेसका नेता तथा पूर्वगृहमन्त्री रमेश लेखकलाई थुनामुक्त गर्न माग गर्दै सर्वोच्च अदालतमा बन्दी प्रत्यक्षीकरणको रिट दायर गरिएको छ। गैरकानुनी रूपमा पक्राउ गरी थुनामा राखिएको दाबी गर्दै उक्त रिट अदालतमा दर्ता गरिएको हो।
यसैबीच, तत्कालीन प्रधानमन्त्री केपी शर्मा ओलीलाई पनि थुनामुक्त गर्न माग गर्दै उनकी पत्नी राधिका शाक्यले छुट्टै बन्दी प्रत्यक्षीकरणको रिट दायर गरेकी छन्। सर्वोच्च अदालतले दुवै रिटमाथि सुनुवाइ सोमबारका लागि तोकेको जनाएको छ।
भदौ २३ र २४ गते भएको जेनजी आन्दोलनमा भएको दमनका घटनामा संलग्न रहेको आरोपमा जाँचबुझ आयोगले ओली र लेखकविरुद्ध मुद्दा चलाउन सिफारिस गरेको थियो। सोही प्रतिवेदनका आधारमा वर्तमान सरकारले दुवै जनालाई शनिबार पक्राउ गरेको हो।
पक्राउपछि लेखकलाई काठमाडौं जिल्ला अदालतमा उपस्थित गराइएको थियो भने स्वास्थ्य अवस्थाका कारण अस्पतालमा रहेका ओलीलाई भर्चुअल माध्यमबाट अदालतमा उपस्थित गराइएको थियो।
यस घटनाले मुलुकको राजनीतिक वातावरण थप तातिएको छ भने सर्वोच्च अदालतको आगामी निर्णयप्रति सबैको ध्यान केन्द्रित भएको छ।
