१६ चैत, काठमाडौं । काठमाडौं जिल्ला अदालतले नेकपा एमालेका नेता महेश बस्नेत विरुद्ध पक्राउ पूर्जी जारी गर्ने अनुमती दिन अस्वीकार गरेको छ। अदालतले यो कदम उच्च अदालत पाटनमा विचाराधीन मुद्दा र फाइलको टुंगो लागेपछि मात्र सम्भव हुने बताएको हो।
महेश बस्नेतमाथि भ्रूण हत्या, बलात्कार र चोरी डाँका मुद्दामा दुईवटा किटानी जाहेरी दिइएको थियो। पहिलो जाहेरीमा प्रहरीले अनुसन्धान अघि नबढाएको र सरकारी वकिलले मुद्दा नचल्ने निर्णय गरेको थियो। उक्त निर्णयविरुद्ध परेका रिट निवेदन उच्च अदालत पाटनले खारेज गरेको थियो।
त्यसपछि पीडित युवतीले अर्को पुरक जाहेरी दिएका थिइन्। तर उक्त जाहेरीमाथि कारवाही नबढेको भन्दै उनले उच्च अदालतमा दोस्रो रिट दायर गरेकी छन्। उच्च अदालत पाटनले सरकारी वकिलको कार्यालयमा रहेको सबै फाइल मागेर अध्ययन गरिरहेको छ।
जिल्ला अदालत काठमाडौंका अनुसार, “माथिल्लो अदालतमा विचाराधीन विषय रहेको अवस्थामा, यस अदालतबाट पक्राउ पूर्जी जारी गर्नु न्यायिक मान्यता र कानुनी व्यवस्थाविपरित हुनेछ।” आदेशमा अदालतले स्पष्ट पारेको छ कि उच्च अदालतबाट सक्कल फाइल प्राप्त भएपछि मात्र सम्बन्धित निर्णय लिन सकिनेछ।
यसैसँग, मुद्दा अझै उच्च अदालतको निर्णयको पर्खाइमा रहेको र कानूनी प्रक्रिया जारी रहेको छ।
