२० वैशाख, काठमाडौं । राष्ट्रिय स्वतन्त्र पार्टी (रास्वपा) ले सुकुमवासी स्थानान्तरणका कारण आत्महत्या भएको प्रमाणित भएमा राज्यले गम्भीर कदम चाल्नुपर्ने बताएको छ।
पार्टीका प्रवक्ता मनिष झा ले यस्तो विषयमा अहिले नै निष्कर्षमा पुग्न नहुने भन्दै पोस्टमार्टम रिपोर्ट र सुरक्षा निकायको अनुसन्धानपछि मात्र वास्तविकता पुष्टि हुने बताएका छन्।
उनका अनुसार “स्थानान्तरणकै कारण आत्महत्या गर्न बाध्य भएको हो भन्ने कुरा प्रमाणित हुन बाँकी छ, प्रमाणित भए राज्यले आवश्यक कदम लिन्छ,” भन्ने स्पष्ट धारणा रास्वपाले राखेको छ।
यो विषय बल्खुस्थित सुकुमवासी बस्ती नजिकै शुक्रबार बिहान बागमती खोलामा ६१ वर्षीय ईन्द्रबहादुर राई मृत फेला परेपछि उठेको हो। उनी घर भत्किएको हेर्न निस्किएको केही समयपछि मृत अवस्थामा भेटिएको बताइएको छ।
घटनाबारे अहिले प्रहरी अनुसन्धान जारी रहेको छ भने स्थानीयस्तरमा पनि यस विषयमा चासो बढेको छ।
