२७ असार, काठमाडौं । मुगुका गणेश नेपालीको आत्मदाहपछि उपचारका क्रममा भएको मृत्युले राजधानीमा आक्रोश थप चुलिएको छ। शनिबार वीर अस्पताल अगाडि ठूलो संख्यामा सर्वसाधारण भेला भएर गणेश नेपालीका लागि न्यायको माग गर्दै प्रदर्शन गरेका छन्।
प्रदर्शनकारीहरूले सरकारप्रति असन्तुष्टि जनाउँदै विभिन्न नाराबाजी गरेका छन्। उनीहरूले घटनाको निष्पक्ष छानबिन, दोषीमाथि कारबाही र पीडित परिवारलाई न्याय दिन माग गरेका छन्। प्रदर्शनका क्रममा सुरक्षा व्यवस्था पनि कडा पारिएको छ।
यता, गणेश नेपालीको शव परिवारले अझै नबुझेपछि पोस्टमार्टमका लागि त्रिभुवन विश्वविद्यालय शिक्षण अस्पताल लगिएको छ। सरकार र पीडित परिवारबीच शुक्रबारदेखि वार्ता जारी रहे पनि अहिलेसम्म कुनै सहमति हुन सकेको छैन।
घटनाले देशभर चासो बढाइरहेका बेला पीडित पक्षले न्याय नपाएसम्म आन्दोलन जारी रहने चेतावनी दिएको छ। सरकार र परिवारबीचको वार्ताले अब के निष्कर्ष निकाल्छ भन्ने विषयलाई सबैले नजिकबाट हेरिरहेका छन्।
