काठमाण्डौ । अमेरिका जान भनेर हिँडेका एक नेपाली युवा बीच बाटोमै फस्दा उनले आफ्नो जीवन बचाइदिन सबै पक्षसँग आव्हान गरेका छन् । काठमाण्डौ, दिल्ली, भेनेजुयला हुदै अमेरिका जान लागेका ती युवाहरु बीच बाटोमै अलपत्र परेपछि उनले आफुलाई बचादिन आग्रह गरेको खबर सोमबारको अन्नपूर्ण पोष्टमा प्रकाशित भएको छ ।
खबर अनुसार ‘अमेरिका जान भनेर काठमाडौं हुँदै दिल्लीबाट भेनेजुयलाको भिसा हानेर पठायो, भेनेजुयलाबाट मेक्सिको जाने क्रममा त्यहाँको एयरपोर्टमा हामीलाई समातेर शरणार्थी शिविर पठाए, बल्लतल्ल छुट्यौं, केहीलाई दलालको कोठामा थुनेर राखेको छ, हामीलाई बचाउनु पर्यो्,’ ग्वाटेमालाबाट टेलिफोनमा पीडा पोख्दै थिए कृष्ण न्यौपाने।
आले थरका दलाललाई प्रतिव्यक्ति २५ देखि ३५ लाख रूपैयाँ बुझाइ अमेरिकी सपना बुनेर हिँडेका ४० जना आफूजस्तै नेपाली युवक अहिले भेनेजुयलामा अलपत्र परेको न्यौपानेले जानकारी दिए ।
भेनेजुयलाबाट ग्वाटेमाला हुँदै अमेरिका पुर्यालउने आश्वासनसहित दलालले पैसा लिए पनि मेक्सिकोको चपाला विमानस्थलमा प्रहरीले पक्राउ गरेको उनले बताएका छन् ।
उनका अनुसार ३५ लाख रुपैयाँ लिइसकेका आले थरका दलालले अझै १५ लाख रुपैयाँ दिएमात्रै अमेरिका पठाइदिनेभन्दै उनीहरुलाई धम्क्याउँदै आएका छन् ।
आलेसँगै हस्ती गुरुङ लगायतका दलालले पर्यटक भिसामा उनीहरु ४० जनालाई भेनेजुएलाका लागि उडाएका थिए । अलपत्र पर्नेमा कृष्णसँगै नुवाकोट, पर्वत, म्याग्दी, चितवन लगायतका जिल्लाका युवक छन्।
