काठमाडौँ । प्रधानमन्त्री शेरबहादुर देउवाले बसुन्धरास्थित बिपी स्मृति सामुदायिक सहकारी अस्पताल लिमिटेडको नयाँ भवनको आज उद्घाटन गरेका छन् ।
अस्पतालको १०औँ वार्षिक साधारणसभाको अवसरमा प्रधानमन्त्री देउवाले आधुनिक तथा डिलक्स क्याबिनसहितको १०० शय्या, १७ आइसियू, १० भेन्टिलेटर र अत्याधुनिक ल्याबसहितको सुविधा सम्पन्न अस्पतालको उद्घाटन गरेका हुन् ।
कार्यक्रमलाई सम्बोधन गर्दै प्रधानमन्त्री देउवाले स्वस्थ्य हुन पाउनुपर्छ भन्ने बिपीको चाहनालाई अस्तपालले पूरा गर्ने विश्वास व्यक्त गर्नुभयो । उनले सबै नेपाली जनताले स्वस्थ्य सेवा पाउनुपर्ने बताए ।
प्रधानमन्त्री देउवाले संघीय संरचनामा मुलुकलाई रुपान्तरण गर्ने क्रममा आफू नेतृत्वको सरकारले जनसवालका विषयमा निर्णय गर्न नपाएको बताएका थिए । उनले भने, “निर्वाचनका समयमा आचारसंहिताका कारण काम गर्न पाइएन ।”
प्रधानमन्त्री देउवाले आफू देश, जनता र प्रजातन्त्रका लागि समर्पित भएको उल्लेख गर्दै आगामी दिनमा पनि उक्त कार्यमा विचलित नहुने प्रतिबद्धता व्यक्त गरे ।
सो अवसरमा उपप्रधान तथा शिक्षामन्त्री गोपालमान श्रेष्ठले स्वस्थ्य जनशक्ति तयार गर्न बिपी स्मृति अस्पतालले महत्वपूर्ण योगदान पु¥याउने विश्वास व्यक्त गर्दै आफूले अस्पताललाई निरन्तर सहयोग गर्ने बताए ।
नेपाली काँग्रेसका नेता अर्जुननरसिंह केसीले आफूले बिपी स्मृति अस्पतालको स्थापनादेखि निरन्तर सहयोग गर्दैै आएको उल्लेख गर्दै आगामी दिनमा अस्पतालले उच्चकोटीको सेवा दिने बताए ।
अस्पतालका अध्यक्ष केदारनरसिंह केसीले अस्पतालबाट आधुनिक सेवा उपलब्ध हुने विश्वास दिलाए । अस्पतालका महासचिव महेश्वर शर्मा पौडेलले दशौँ वार्षिक साधारणसभाको वार्षिक प्रतिवेदन पेश गर्नुका साथै आगामी वार्षिक कार्यक्रम प्रस्तुत गरेका थिए।
