आदिवासी जनजाति महासंघ भक्तपुर अधिवेशनः यस्तो चयन भयो नयाँ कार्यसमिति

२६ पुस, भक्तपुर । नेपाल आदिवासी जनजाति महासंघ जिल्ला परिषद् भक्तपुरको तेस्रो जिल्ला अधिवेशन आज भक्तपुर नगरपालीकाको थिमी ब्याङ्केटमा भव्यतापूर्वक सम्पन्न भएको छ। यस अधिवेशनले नयाँ कार्यसमिति चयन गर्दै आगामी तीन वर्षका लागि संगठनको दिशा निर्धारण गरेको छ।
अधिवेशनमा भक्तपुर जिल्लाभरका विभिन्न आदिवासी जनजाति समुदायका प्रतिनिधि, सदस्य संगठनका पदाधिकारी, तथा अतिथिहरूको उल्लेख्य उपस्थिति रहेको थियो। कार्यक्रमको प्रमुख अतिथिको रूपमा प्रमुख अतिथि गोविन्द हेल्मु,केन्द्रीय सचिव, नेपाल आदिवासी जनजाति महासंघ, भक्तपुर उपस्थित रहनुभएको थियो भने विशेष अतिथिहरूमा भक्तपुरका विभिन्न आदिवासी जनजाति संघका पदाधिकारीहरू रहेका थिए।
कार्यक्रम नेपाल आदिवासी जनजाति महासंघ भक्तपुर जिल्लाका अध्यक्ष सानुकान्छा आलेमगरको अध्यक्षतामा सम्पन्न भएको थियो। विभिन्न वक्ताहरुले विगत तीन वर्षको संगठनात्मक गतिविधि, उपलब्धि, चुनौती तथा भविष्यका योजना समेट्दै भक्तपुरमा आदिवासी जनजातिहरूको अधिकार संरक्षण, सांस्कृतिक संवर्द्धन, शिक्षा, स्वास्थ्य तथा रोजगारीका क्षेत्रमा थप प्रभावकारी काम गर्ने प्रतिबद्धता व्यक्त गरे ।
अधिवेशनले सर्वसम्मत नयाँ कार्यसमिति चयन गरेको छ। नयाँ कार्यसमितिको नेतृत्वमा अध्यक्षमा हरि बहादुर श्रेष्ठ , उपाध्यक्ष तेजबहादुर केरुङ, उपाध्यक्ष रत्न बहादुर राई, उपाध्यक्ष संगीत मगर, उपाध्यक्ष हुवाई, सचिव कान्छा तामाङ, सहसचिवहरु कविता तामाङ, विर्ख माझी, केदार थापा मगर, विना चाम्लिङ राई, र कोषाध्यक्षमा लालबहादुर सुनुवार पदाधिकारी चयन भएका छन्।
नवनिर्वाचित अध्यक्षले आफ्नो मन्तव्य राख्दै भने,
“भक्तपुरमा बसोबास गर्ने विभिन्न आदिवासी जनजाति समुदायहरूको एकता, अधिकार र पहिचानको संरक्षणका लागि हामी अझ सशक्त ढङ्गले अगाडि बढ्नेछौं। राज्यका नीति निर्माण तहमा हाम्रो प्रभावकारी सहभागिता सुनिश्चित गर्न र स्थानीय तहमा सांस्कृतिक तथा सामाजिक विकासका कार्यक्रमलाई प्राथमिकता दिनेछौं।”
अधिवेशनमा बोल्दै प्रमुख अतिथिले नेपालको संविधानले आदिवासी जनजातिहरूलाई प्रदान गरेको अधिकारको कार्यान्वयनमा जोड दिँदै संगठनलाई स्थानीय सरकारसँग सहकार्य गरेर काम गर्न आग्रह गर्नुभयो। कार्यक्रममा आदिवासी जनजाति समुदायका सांस्कृतिक प्रस्तुति, नेवारी , सुनुवार,लोक बाजा तथा नृत्य पनि प्रस्तुत गरिएको थियो जसले माहोललाई थप उत्साहपूर्ण बनाएको थियो।
नेपाल आदिवासी जनजाति महासंघ जिल्ला परिषद् भक्तपुरले यो अधिवेशनमार्फत जिल्लामा संगठनलाई थप सुदृढ र गतिशील बनाउने प्रतिबद्धता व्यक्त गरेको छ। यसले भक्तपुरका आदिवासी जनजाति समुदायहरूको हकहित र विकासमा महत्वपूर्ण योगदान पुग्ने अपेक्षा गरिएको छ।