माघ १८, बैतडी । फागुन २१ मा हुने प्रतिनिधिसभा सदस्य निर्वाचनमा सुदूरपश्चिम प्रदेशको बैतडीमा प्रतिस्पर्धा चर्किएको छ। लगातार तीन पटक जित हासिल गरेका नेकपा एमालेका दामोदर भण्डारी चौथो पटक पनि जित्ने दावी गर्दै मैदानमा छन्। भण्डारी यसअघि मन्त्री पनि भइसकेका छन्।
उनीलाई हराउन नेपाली कांग्रेसले जिल्ला सभापति चतुरबहादुर चन्दलाई उतारेको छ। चन्द नेपाल क्रिकेट संघ (क्यान) का अध्यक्षसमेत हुन्। त्यस्तै, नेकपाबाट परमानन्द भट्ट र राष्ट्रिय स्वतन्त्र पार्टी (रास्वपा) बाट हरिमोहन भण्डारीले उम्मेदवारी दिएका छन्। यसरी चार मुख्य उम्मेदवारबीच प्रतिस्पर्धा हुने अनुमान गरिएको छ।
रास्वपाबाट उम्मेदवार बनेका हरिमोहन भण्डारी कांग्रेसका पुराना नेता हुन्। उनी २०७९ को प्रदेशसभा चुनावमा टिकट नपाएपछि स्वतन्त्र उम्मेदवार बनेका थिए र ११ हजार मत पाएका थिए। नेकपाबाट उम्मेदवार परमानन्द भट्ट भने बैतडी एमालेका संस्थापक नेता हुन्।
एमालेले आफ्नो दबदबा कायम राखेर जित्ने लक्ष्य राखेको छ भने कांग्रेस र नेकपा भने बलियो संगठनको आधारमा भण्डारीलाई रोक्ने दाबी गरिरहेका छन्। रास्वपा पनि युवामाझ बढ्दो लोकप्रियतालाई फाइदा उठाउँदै नयाँ इतिहास बनाउने लक्ष्यमा छ।
२०७९ मा भण्डारीले ३३,६११ मतसहित जित हासिल गरेका थिए। कांग्रेस उम्मेदवार चन्दले भने जनता एमालेले विकासमा अपेक्षा अनुसार काम नगरेको भन्दै यसपटक आफूलाई मतदान गर्ने जनाएका छन्।
यसपटक बैतडीमा कुल ११ उम्मेदवार छन्, जसमा १० दलका उम्मेदवार र एक स्वतन्त्र उम्मेदवार छन्। अन्य प्रमुख उम्मेदवारमा राप्रपा, जसपा, नेमकिपा, श्रम संस्कृति पार्टी, नेकपा माओवादी र आम जनता पार्टीका प्रतिनिधिहरू छन्।
चार मुख्य उम्मेदवारबीचको यो रोचक प्रतिस्पर्धाले बैतडीको राजनीतिक परिदृश्य अझै चर्काउने देखिन्छ।
