काठमाडौं, २९ माघ । नेपाली अर्थशास्त्री सोना श्रेष्ठलाई एसियाली विकास बैंक (एडीबी) ले दक्षिण एसिया विभागको महानिर्देशक पदमा नियुक्त गरेको छ। उनी अब बंगलादेश, भुटान, भारत, माल्दिभ्स, नेपाल र श्रीलंकामा एडीबीको रणनीति र सञ्चालन नेतृत्व गर्नेछिन्।
श्रेष्ठ यसअघि सोही विभागको उपमहानिर्देशक थिइन् र एडीबीमा उच्च नेतृत्वमा पुग्ने थोरै नेपाली कर्मचारीमध्ये एक हुन्। उनले उपमहानिर्देशकको जिम्मेवारी ३ अप्रिल २०२५ देखि सम्हालेकी थिइन्। यसअघि उनी स्वतन्त्र मूल्यांकन विभागको उपमहानिर्देशक, एडीबीको सहायक सचिव तथा अन्य वरिष्ठ पदमा काम गरिसकेकी छन्।
उनले दक्षिण–पूर्व एसियाली क्षेत्रीय विभागमा सार्वजनिक व्यवस्थापन, वित्तीय क्षेत्र र व्यापारसम्बन्धी निर्देशक, इन्डोनेसियाका लागि उपदेशीय निर्देशक र फिलिपिन्सका लागि प्रिन्सिपल कन्ट्री इकोनोमिस्टको रूपमा पनि अनुभव हासिल गरिसकेकी छिन्।
नयाँ जिम्मेवारी पाउँदा सम्मानित महसुस भएको बताउँदै श्रेष्ठले भनेकी छन्, “समावेशी र दिगो विकासमा योगदान पुर्याउन एडीबीको संलग्नता अझ गहिरो बनाउन यस क्षेत्रका विकासशील सदस्य राष्ट्रहरूसँग मिलेर काम गर्न उत्साहित छु।”
श्रेष्ठको अन्तर्राष्ट्रिय विकास, नीतिगत विश्लेषण, परियोजना सञ्चालन र मूल्यांकनमा २७ वर्षको अनुभव छ। उनी अमेरिकाको युनिभर्सिटी अफ क्यालिफोर्नियाबाट अर्थशास्त्रमा पीएचडी गरेकी हुन् र स्मिथ कलेज, अमेरिका बाट बीए गरेकी छिन्।
एडीबीमा उनले २३ वर्ष काम गर्दै मध्य र पश्चिम एसिया, दक्षिण एसिया र दक्षिण–पूर्वी एसियामा परियोजना सञ्चालनको अनुभव हासिल गरेकी छिन्। सन् १९६६ मा स्थापित एडीबीले ६९ सदस्य राष्ट्रको सहयोगमा एशिया–प्रशान्त क्षेत्रमा समावेशी, दिगो र उत्थानशील विकासलाई समर्थन गर्दै आएको छ।
