८ चैत, काठमाडौं । अख्तियार दुरुपयोग अनुसन्धान आयोगले पोखरा विमानस्थल निर्माण परियोजनामा भ्रष्टाचार गरेको आरोपमा पूर्वसचिव केदारबहादुर अधिकारीसहित २३ जनाविरुद्ध मुद्दा दायर गरेको छ।
मुद्दामा नेपाल नागरिक उड्डयन प्राधिकरणका तत्कालीन महानिर्देशकहरू, प्रबन्धकहरू, परियोजना प्रमुख, परामर्शदाता टिम र ठेकेदार कम्पनीका प्रतिनिधि समावेश छन्। अख्तियारले कुल ४६ करोड १५ लाख रुपैयाँ हानीनोक्सानी भएको दाबी गरेको छ।
अख्तियारको अनुसार, ठेक्का सम्झौतामा डिजाइन र निर्माण सुपरभिजनका लागि परामर्शदाता नियुक्त गर्न २८ लाख अमेरिकी डलर छुट्याइएको थियो। तर, उक्त रकम खर्च नगरी नेपाल नागरिक उड्डयन प्राधिकरणको छुट्टै बजेटबाट ५० करोड ३४ लाख रुपैयाँ खर्च गरिएको थियो।
अख्तियारले भनेको छ कि परामर्शदाता नियुक्ति र खरिद प्रक्रिया प्रारम्भ नै बदनीयतपूर्ण थियो। ठेक्का सम्झौतामा तोकिएको रकमभन्दा बढी अनुमान गरी प्राधिकरणको अतिरिक्त बजेट खर्च गर्नु गलत भएको उनको दाबी छ।
ईआरएमसी स्लेट जेभी कम्पनीसँग ४२ करोड ८९ लाख रुपैयाँको सम्झौता भएको थियो र ४० करोड ६८ लाख रुपैयाँ भुक्तानी गरिएको थियो। अख्तियारले सचिव अधिकारीमाथि पुरै बिगो मागदाबी गरेको छ भने अन्य प्रतिवादीहरूमा फरक–फरक रकमको दाबी गरिएको छ।
साथै, आन्तरिक लागत अनुमानमा १९ करोड ५२ लाख रुपैयाँ बढाएर परामर्श सेवाका लागि छुट्याइएको रकमबाट मेसिन उपकरण खरिद गरिएको पनि अख्तियारको आरोपमा उल्लेख छ। उनीहरूले लोन सम्झौता हुनुभन्दा अघि नै प्राधिकरणको रकम खर्च भएको दाबी गरेका छन्।
