१९ चैत, काठमाडौं । स्वतन्त्र सांसद महावीर पुन ले प्रतिनिधिसभामा आफ्नो भूमिका निष्पक्ष रहने स्पष्ट पारेका छन्। बिहीबारको पहिलो बैठकमा उनले आफू ‘आउनै नपर्ने मान्छे’ भएको बताएर संसदमा अचम्मको उपस्थितिको परिचय दिएका हुन्।
सांसद पुनले भने, “म एउटा अचम्मको सांसदको रूपमा यहाँ आएको छु, किनभने म फरक छु। बोल्ने तरिका, काम गर्ने तरिका फरक छ, प्रायः सबैसँग मिल्दिनँ। तर मेरो भूमिका पक्ष–विपक्ष भन्दा बढी निष्पक्ष हुनेछ।”
अमेरिकामा अध्ययन गरेर २०४९ भदौमा फर्किएको उनले आफ्नो ३३ वर्ष समाजसेवीको रूपमा बिताएको बताए। समाज सेवा नै उनको प्राथमिक ध्येय रहेको उनले स्पष्ट पार्दै, संसदमा उम्मेदवार हुने वा राजनीति खेल्नको लागि आएको नभएको बताए।
सांसद पुनले आफ्नो विगतको शिक्षा मन्त्री पदको अनुभव पनि साझा गरे। उनले चार महिना शिक्षा मन्त्री रहँदा विद्यालय, कलेज र विश्वविद्यालयमा शैक्षिक वातावरण सुधार गर्न विधेयक र नियमावली तयार गर्ने प्रयास गरेको तर कामचलाउ सरकारका कारण पूर्णतया अघि बढ्न नसकेको बताए।
“उम्मेदवारी दर्ताको ४० घण्टा अघि पनि विधायन समितिबाट काम अघि बढेन। त्यसपछि मन्त्री पदबाट राजीनामा दिएर चुनावमा उभिएँ। यसरी म संसदमा उठ्ने नपर्ने मान्छे उठेको हुँ,” उनले भने।
सांसद पुनले शिक्षा क्षेत्र सुधारका आफ्नो मस्यौदा विधेयक र नियमावली प्रधानमन्त्री बालेन्द्र शाह को टिमलाई दिइसकेको पनि जानकारी दिएका छन्।
