राष्ट्रियसभा सदस्य निर्वाचनका लागि मनोनयपत्र दर्ता गराएका उम्मेदवारहरुको नामावली आज सार्वजनिक हुँदैछ । निर्वाचनका लागि सोमबार ५२ उम्मेदवारहरुले मनोनयन दर्ता गरेका थिए ।
राष्ट्रिय सभाका १९ जना सदस्यका लागि माघ ११ गते हुने निर्वाचनका लागि सोमबार ७ प्रदेशबाट ५२ जनाले उम्मेदवारी दिएका थिए ।
राष्ट्रिय सभा सदस्य पदका लागि कोशी प्रदेशमा २ सिटका लागि ५ जना, मधेस प्रदेशका २ सिटका लागि ५ जना र बागमती प्रदेशमा ४ सिटका लागि १५ जनाले उम्मेदवारी दिएका छन् ।
यस्तै, गण्डकी प्रदेशमा ३ सिटका लागि ८ जना, लुम्बिनी प्रदेशमा २ सिटका लागि ७ जना, कर्णाली प्रदेशमा ३ सिटका लागि ६ जना र सुदूरपश्चिम प्रदेशमा ३ सिटका लागि ६ जनाले उम्मेदवारी दिएका छन् ।
हिजो बुधबार उम्मेदवारी दिएकाहरूको मनोनयपत्रमाथि जाँचबुझ भएको र उजुरी उपर जाँचबुझ गरी निर्णय गरिएका कारण आज नामावली प्रकाशन गरिने आयोगले जनाइएको छ ।
आज नामवली प्रकाशन भएपछि आयोगले उम्मेदवारहरुलाई नाम फिर्ताको समय दिनेछ । राष्ट्रियसभा सदस्य निर्वाचनका लागि आयोगको निर्धारण गरेको कार्यतालिका अनुसार शुक्रबार उम्मेदवारले नाम फिर्ता लिन सक्नेछन् ।
यस्तै, शुक्रबार नै उम्मेदवारको अन्तिम नामावली प्रकाशन गरिनेछ ।
