२० साउन, काठमाडौं । खानेपानीमन्त्री प्रदीप यादवले तराई–मधेशको खानेपानी समस्याको दीर्घकालीन समाधानका लागि यथाशीघ्र ठोस योजना तयार गर्न आवश्यक रहेको बताएका छन् ।
काठमाडौंमा मंगलबार खानेपानी तथा ढल व्यवस्थापन विभागको गत आर्थिक वर्ष २०८१/०८२ को वार्षिक प्रगति समीक्षा गोष्ठीको उद्घाटन कार्यक्रमलाई सम्बोधन गर्दै उनले यस्तो बताएका हुन् । मन्त्री यादवले तराई–मधेशको खानेपानी समस्याको दीर्घकालीन समाधानको ठोस उपायमा काम गर्नका लागि विभागलाई निर्देशन दिने समेत जानकारी गराएका छ् ।खानेपानी, सरसफाइ तथा ढल निकासको क्षेत्रमा उल्लेखनीय प्रगति गर्दै खानेपानी मन्त्रालय विकासे मन्त्रालयहरु मध्येमा सबै भन्दा उत्कृष्ट नतिजा ल्याउन सफल भएको उनको भनाइ थियो ।
त्यस्तै, खानेपानी तथा ढल व्यवस्थापन विभागका महानिर्देशक रामकुमार श्रेष्ठले गत आर्थिक वर्षमा खानेपानी, सरसफाइ तथा ढल निकासको क्षेत्रमा गरेका कार्यहरूको विस्तृत जानकारी गराएका थिए । आगामी दिनमा अझ प्रभावकारी रूपमा अघि बढ्ने उनले प्रतिबद्धता समेत व्यक्त गरेका छन् । मन्त्री यादवको स्पष्ट निर्देशन, मन्त्रालयसहित विभागका कर्मचारीहरुको सहयोगमा विभागले देशैभरी ९० प्रतिशत प्रगति हासिल गरेको उनको भनाइ छ । आगामी दिन थप प्रगति गर्ने समेत उनको धारण थियो ।
सोही कार्यक्रममा मन्त्रालयका सचिव ई.प्रमिलादेवी शाक्य बज्राचार्य र सहसचिव मीना श्रेष्ठले विभागले गत आवमा हासिल गरेको प्रगति प्रति खुशी व्यक्त गरेका थिए। कार्यक्रममा विभागीय निर्देशक, प्राविधिक, कर्मचारी तथा सरोकारवाला निकायका प्रतिनिधिहरूको समेत उपस्थिति रहेको थियो ।
