१० पुस, काठमाडौं । प्रधानमन्त्री सुशीला कार्कीले नेपालको उच्च शिक्षामा सुधार आवश्यक भएको भन्दै विश्वविद्यालय प्रशासनमा परिवर्तनको संकेत गरेकी छन्। उनले भनिन् कि प्रधानमन्त्री नै विश्वविद्यालयको कुलपति हुने वर्तमान व्यवस्थामा परिमार्जन गर्नुपर्ने आवश्यकता महसुस भएको छ र यसबारे गम्भीर परामर्श र गृहकार्य भइरहेको छ।
प्रधानमन्त्री कार्कीले शैक्षिक क्षेत्रमा अनावश्यक दलीय हस्तक्षेपले निरन्तर असर पारेको बताएर यसलाई अन्त्य गरी विश्वविद्यालयलाई प्राज्ञिक बहसको थलो बनाउन सबै पक्षले प्रयास गर्नुपर्ने आवश्यकता औँल्याइन्। उनले उच्च शिक्षाका लागि विदेश जाने नेपाली विद्यार्थीको ठूलो संख्यालाई ध्यानमा राख्दै गुणस्तरीय, समयानुकूल र व्यावहारिक शैक्षिक कार्यक्रम थप गर्न पनि सरोकारवालाहरूले पर्याप्त ध्यान दिनुपर्ने बताइन्।
साथै उनले विद्यार्थीहरूको भावना समेट्दै भनिन्, “परीक्षा लिइसकेपछि समयमा नतिजा मात्र प्रकाशन गरिदिए पनि हुन्थ्यो। यो अवस्था किन आयो भन्ने प्रश्नमा विश्वविद्यालय र सरोकारवालाले गम्भीरतापूर्वक उत्तर खोज्नुपर्छ।”
प्रधानमन्त्री कार्कीले प्रविधिको तीव्र विकास र विश्वव्यापी जनसञ्चारको परिस्थितिमा नेपालको उच्च शिक्षा प्रणाली पनि समयानुकूल सुधार आवश्यक रहेको उल्लेख गर्दै, ठोस पहल सुरु भइसकेको जानकारी दिइन्।
