१८ चैत, काठमाडौं । पछिल्लो एक महिनामा कम्बोडियाबाट १२७ नेपाली उद्धार गरिएको छ। प्रहरीको मानव बेचबिखन अनुसन्धान ब्युरोका एसएसपी कृष्ण पंगेनी का अनुसार बुधबार मात्र ८ जनालाई उद्धार गरेर काठमाडौं ल्याइएको छ।
उद्धार गरिएको व्यक्तिहरूलाई अलपत्र पार्ने र कामको नाममा झुक्याएर विदेश लैजाने घटनामा प्रहरीले एकजनालाई पक्राउ गरी अनुसन्धान गरिरहेको छ। पछिल्लो एक महिनामा ८ वटा मुद्दा दायर भइसकेका छन् र पीडितबाट उजुरी संकलन गर्ने प्रक्रिया जारी छ।
एसएसपी पंगेनीले बताए अनुसार युवालाई “कम्प्युटर काम” वा “सेक्युरिटी गार्ड”को बहानामा कम्बोडिया लगेर त्यहाँ साइबर ठगीमा प्रयोग गर्ने प्रवृत्ति देखिएको छ। थाइल्यान्ड, म्यानमार, कम्बोडियाजस्ता देशमा नेपाली युवा–युवतीलाई लगेर साइबर दासको रूपमा काम लगाउने घटनाहरू बढेका छन्।
पक्राउ परेका समूहले सरकारी पहुँच नहुने ठाउँमा क्याम्प खडा गरी पीडितलाई अनैतिक रूपमा काम लगाउने गरेको र सुरक्षा सुनिश्चित नगर्ने गरेको प्रहरीको अनुसन्धानले देखाएको छ। प्रहरीले यस विषयमा सचेत रहन र यस्ता झुक्याउने प्रस्तावबाट टाढा रहन नागरिकलाई आग्रह गरेको छ।
