२० चैत, काठमाडौं । गोरखा सेभिङ एन्ड क्रेडिट सहकारी संस्था लिमिटेड का अध्यक्षसहित चार जना काठमाडौं उपत्यकाबाट पक्राउ परेका छन्। पक्राउ पर्नेमा अध्यक्ष इमानसिंह राई, प्रमुख कार्यकारी अधिकृत लालबहादुर क्षेत्री, अविन कुमार राई तथा पूर्व लेखा सदस्य कर्णबहादुर राई रहेका छन्।
काठमाडौं उपत्यका अपराध अनुसन्धान कार्यालय का अनुसार उनीहरूलाई उपत्यकाका विभिन्न स्थानबाट नियन्त्रणमा लिइएको हो। कार्यालयका प्रवक्ता मनोहर भट्ट ले सहकारीको ठूलो रकम हिनामिना गरेको आरोपमा उनीहरूलाई पक्राउ गरिएको जानकारी दिए।
प्रारम्भिक अनुसन्धान अनुसार सहकारीमा १० हजार ५९८ बचतकर्ताको ४ अर्ब ५ करोड ६० लाखभन्दा बढी रकम जम्मा भएको थियो। तर उक्त रकममध्ये १ अर्ब ४९ करोडभन्दा बढी मात्रै ऋण तथा लगानीका रूपमा प्रवाह गरिएको देखिएको छ भने बाँकी रकमको स्पष्ट विवरण फेला परेको छैन। साथै प्रवाह गरिएको ऋणमध्ये धेरैजसो कमसल धितो वा बिना धितो दिइएको पनि खुलेको छ।
पक्राउ परेका चारै जनालाई थप अनुसन्धानका लागि जिल्ला प्रहरी परिसर ललितपुर पठाइएको छ। घटनाले सहकारी क्षेत्रको पारदर्शिता र नियमनप्रति गम्भीर प्रश्न उठाएको छ।
